Pork & Poultry Processing Plant hman theihin peih thuai dawn - MIFCO Chairman

Mizoram Food & Allied Industries Corporation (MIFCO) chairman Lalṭhazuala Rawite chuan, Bûng Bangla-a Pork & Poultry Processing Plant chu ar leh vawk sa sâwngbâwlna atan hman theiha peih thuai a nih dawn thu a sawi.

MIFCO Chairman hian January 4, Inrinni khan Pork & Poultry Processing Plant a tlawh a, "Ṭangkai taka hman theih turin buatsaih mek a ni a, tun aṭanga hun rei lo têah ar leh vawk sâwngbàwlna hmun hi hman theihin peih a ni dawn a, mipuite'n sa thianghlim ei tur kan nei thuai dawn a ni," a ti.

Pork & Poultry Processing Plant chu kum 2008 khan hawn ni tawh mah se, tun thlengin a taka hman a la ni lo tih sawiin Lalṭhazuala chuan, "Keini sorkar chuan ṭangkai taka hman kan tum a, tunah hian a building leh khawl chhe laite siam ṭhain, thawm ṭhat mek a ni a, rei lo têah kan peih ang," a ti a; vawk sa sâwngbâwl phawt a ni ang a, ar leh bawng sate pawh la sâwngbâwl zel tum a nih thu a sawi.

MIFCO Chairman chuan, "MIFCO hi ram mipuite'n kan la chhawr dawn chauh. Chhingchhipa thei sâwrna hmun pawh thuam ṭhain kan sâwr mek tawh a, Pork & Poultry Processing Plant-ah hian sa thianghlim chauh buaipui a ni dawn a, mithiamte'n an endik vek zel dawn a ni," a ti.