PM Narendra Modi sorkarin hnam hnufual zawkte a rapbet - Zodintluanga

All India Adivasi Congress Committee (AIACC) National Executive member Zodintluanga Ralte chu nimin khan Ambassa, Tripura-a State Level Convention-a chief orator a ni a; prime minister Narendra Modi sorkar chu hnam hnufual zawkte rapbet a, democracy palzûtah a puh.

Zodintluanga Ralte chuan, Narendra Modi sorkar chuan tribal leh hnam hnufualte dinhmun nasa takin a tichhe mek niin a sawi a, "India ram danpui nasa taka palzût a ni a, an duh dan ang leh an lal theihna tur atan te, a mi huatzawng tihṭhaih nan hmanruaah sorkar an hmang mek a ni," a ti.

Congress party-in India rama hnam hnufual zawkte dinhmun a chawisàn dan sawiin Zodintluanga chuan, "Hnam hnufual zawkte chenna leh an hnam nunphung vawnhim zel a nih theih nan UPA sorkarin ku 2006-ah Forest Rights Act pass a ni," a ti a; Forest Rights Act chu NDA sorkarin an kalpui duh lo a, company leh leh mi hausa zawkte'n tribal leh hnam hnufualte chenna hmun an hnehchhuh mek niin a sawi.

Zodintluanga Ralte chuan, BJP kaihhruai NDA sorkarah chuan India hmarchhaka hnam hnufual zawkte dinhmunin chhiat zual zel lam a pan nia sawiin, "Manipur-ah hnam tlem zawkte'n beih an tâwk mek a, BJP kaihhruai sorkar laipui leh Manipur state sorkar BJP kaihhruaite chuan buaina hi engah mah an ngai lo," a ti.

Congress party president Mallikhajun Kharge leh Rahul Gandhi ten hnam hnufual leh hnam tlem zawkte tan theihtawp an chhuah mek nia sawiin Zodintluanga chuan, "Lok Sabha inthlan leh hunah chuan Congress a sorkar leh ngei tawh dawn," a ti a; hnam hnufual leh hnam tlem zawkte'n Congress sorkar hun an nghakhlel hle niin a sawi.