KHAWTHLIR

KṬP-in thisen pe

KṬP, Maubawk Bial chuan January 4, Inrinni khan Lawipu Kohhran Hall-ah thisen pek huaihawtin, Synod Hospital tan thisen unit 36 an pe a, petute mipa 34 leh hmeichhia pahnih an ni.

CS chanpual tur

Mizoram sorkar chuan chief secretary Khilli Ram Meena department chanpual tur a siam a; chu'ngte chu - Home, Political & Cabinet leh Vigilance-te a ni.

Ṭanpuina hlan

Assam Rifles chuan pawl ṭhenkhatte nen January 4, Inrinni khan World Braille Day pualin hun an hmang a, Special Blind School, Durtlangah thilpek an hlân. January 4 vêk khan Assam Rifles chuan Aizawla AR War Memorial-ah ram tana kum 2003-a Kohima-a nunna hlântu riflemen Sandeep Chhetri hriatrengna pualin hun an hmang bawk.

India-a nau piang hmasa berah chhál

Remruatsanga leh Ramzirmawii, Khatla East te fa Frankie Remruatdika Zadeng chu India rama kum 2025-a nau piang hmasa ber leh Generation Beta (Gen Beta) chhunga nau piang hmasa ber anga chhàl a ni. Frankie Remruatdika Zadeng hi December 31, 2024 zanlai pelh dar 12:03 (January 1, 2025 dar 0:03) khan Synod Hospital-ah a piang a, kg 3.120-a rit a ni. Mihring pian kum aṭanga tehin generation ṭhen niin, kum 2025 leh 2039 inkara piangte chu Generation Beta tih vuah an ni a; Frankie Remruatdika hi Gen Beta chhunga India rama nau piang hmasa bera chhàl a ni.

Kum tling lo hming tarlan chungchang

Bethlehem Veng JAC-in an venga halpuah/halmawi hâltu mi pathum sorkara thuneitute hnena an thlen zinga pakhat, kum 24 anga tarlan chu kumtlinglo, kum 14 mi a nih thu dawn a ni. JAC thuchhuakah kum tling tawh vek anga tarlan a nih avangin Vanglaini-ah pawh January 4, 2025 khan an hming nen tarlan a ni a; kum tlinglo hming tarlan palhah mipui hriatthiamna kan dil e.