Kum 2015-16 chhungin Mizoramin sum vbc 5327.72 hmuh beisei

Chief minister Lal Thanhawla hoin nimin khan CMO Cabinet Room-ah sorkar mi pawimawhte an ṭhukhawm a; kum 2015-16 chhungin Mizoramin cheng vbc. 5327.72 a hmuh beisei a nih thu an tarlang.

Meeting-ah hian sorkar laipuiin Planning Commission a tihtawp hnuah, a thlakna tura din NITI Aayog-in kalphung thar tur ruahmanna a la siam loh thu an tarlang a; kum 2015-16 chhunga project hrang hrang kalpuina tur CSS, NLCPR leh NEC scheme-te tan fund awm dan tur hriat a la nih loh thu leh, state matching share tur zat tihchian a la nih loh thute an sawi bawk.

CSS, NEC leh NLCPR atana sum hmuh turte chu department-te aṭanga ruahman ṭhin a nih avangin, Finance department-in chhût chhuakin, regular budget tur duan theih a nih an beisei. 14th Finance Commission aṭanga sum hmuh tur zawng zawng nen, kum 2015-16 chhunga Mizoramin sum a hmuh tura beisei zat chu cheng vbc. 5327.72 a ni.

Meeting-a tarlan danin, sorkar laipuiin kal phung thar tur ruahmanna a la neih loh avangin kal dan phung pangngai baka kal ngaihna a awm lo a ni.

Meeting-ah hian Home minister R Lalzirliana, Finance minister Lalsawta, Planning Board vice chairman H Liansailova, parliamentary secretary (Finance) KS Thanga bakah, Finance leh Planning official-te an tel.