Panchayati Raj minister Meghwal-a'n Zan khat riakin Mizoram a rawn tlawh

Minister of state for Panchayati Raj Nihal­chand Meghwal chuan zan khat riak turin nimin khan Aizawl a rawn thleng. Union minister hian nimina LAD minis­ter PC Lalthanliana nen an inkâwmnaah khaw­tlang hmasawnna tur ruahmannate siama sorkar laipuia thehlut turin a sawm a, "In rawt­nate a ṭul angin ka lo bawhzui ang," a ti.

Nihalchand Meghwal leh LAD minister PC Lalthanliana hi nimin khan State Guest House-ah an inkâwm a; parlia­mentary secretary (LAD) K Lalrinthanga, LAD secretary C Thatkunga leh Mizoram district hrang hranga DRDA project director-te leh auto­nomous district coun­cil hotute pawh a kâwm a ni.

Panchayati Raj Minister chuan, ram puma Panchayati Raj kalpui dan sorkar laipuiin a ennawn mek tih sawiin, "State sorkarte thuam chak a, thuneihna tam zawk pek a, anmahni inrêlbâwl turin kalpui sorkar laipui chuan a duh a ni," a ti a; khawtlang inrêlbâwlnaah hmeichhia a tam thei ang ber dah a pawimawh thu a sawi.

Union minister hnen­ah hian LAD hotute chuan, 14th Finance Commission hnuaia Local Body Grant dawng thei lo state pathum zingah Mizoram a tel thu sawiin, chumi avang leh Mizoram sorkar sum harsatna avangin a bik taka ngaihtuah an ma­mawh thu an thlen a; ADC hotute pawhin an harsatna leh mamawh hrang hrangte an thlen bawk.

LAD hotute chuan, Panchayati Raj Minister chu Mizoramah village council 812 a awm thu te, chung zinga 279 chu ADC hnuaia awm a nih thu te, V/C member zawng zawng 2,056 zinga 564 chu hmeichhia an nih mek thute an sawi a; 13th Finance Commission aṭangin khawtlang ma­mawh hna chi hrang hrang thawh nan cheng nuai 8787.19 dawn a nih thu an hrilh.

Nihalchand Meghwal hian nimin tlai khan Governor Lt. Gen. Nir­bhay Sharma leh chief minister Lal Thanhawla te pawh a kâwm a; vawi­inah Lengpuia V/C-te a kâwm ang a, chumi hnuah Mizoram a chhuahsan ang.