KHAWTHLIR

Thisen pe
1st Battalion CRPF, Tuiriala mite chuan nimin khan an hmunah blood donation camp an nei a, Aizawl Civil Hospital tan thisen unit 59 an pe. Kolasib Ṭumpui Branch KṬP Jeremia Group-te pawhin nimin khan Kolasib damdawi-inah thisen unit 20 an pe a, mipa 17 leh hmeichhia pathum an ni.

Bus neitute'n hriatthiam ngen
Aizawl City Bus Owners' Association (ACBOA) chuan thuchhuah siamin, Kelkanga harhna chhim turte'n Aizawl City Bus ṭhahnem tak an hman ṭhin thu tarlangin, "Khawpui chhungah bus service a tam tawk thei loa, mipuite harsatna sukiang turin nitin bus ding ṭhinte pawh ding awm loin khawpui chhungah service tir vek an ni," an ti a, mipuite hriatthiamna an ngen.

IFS-ah kaisang
Vanlalchuailova, DFO Champhai chu tun hnai khan Indian Forest Service (IFS) ah a kaisang a, AGMUT cadre pek a ni. A post ngai chelh chhunzawm tura tih a ni.

Awm man peksak
Zanlawn Branch YMA chuan YMA Day pualin an khaw mi damdawi-ina awm man pe thei lo mi 10-te chu awm man an peksak a; a vaiin Rs. 1,01,328 an sêng a ni.

Motor insúah thi
June 15, 2015 chawhma dar 11 vel khan Zawlnuam Vaivengah LPK truck MZ-08 2224 leh bike MZ-08 2923 an insû a, bike khalhtu Vanlalnghaka s/o JR Nunthara, Zawlnuam Ṭhuampui Veng chu Kawrthah damdawi-in panpui a nih hnuah a hliam tuar loin a thi. Truck driver Lalrinsanga s/o Lalhnuna (L), Mamit Field Veng erawh a hliam lo.

Vaihlo zirho
MZP leh Mizoram State Tobacco Control Society (MSTCS)-te chuan nimin khan MZP Pisapui conference hall-ah ṭhalaite zinga vaihlo leh a kaihhnawih thil do dan tur zirhona an buatsaih. MSTCS state nodal officer Dr Jane Ralte-in thupui a sawi a, sawiho nghal a ni a; workshop-ah hian college, higher secondary school leh high school ṭhenkhata zirlaite an tel.

NLUP sem
Soil & Water Con­servation depart­ment chuan nimin khan NLUP third phase leh fourth phase hnuaia second in­stal­ment ṭanpuina an sem a, Lunglei HPC vice chairman S Lal­dingliana'n a dawngtute hnenah a hlan. NLUP ṭanpuina hi third phase-a coffee, ṭhelret leh hmunphiah thlangtu chhungkua 280 hnenah Rs. 1,15,98,000 leh, fourth phase-ah chhung­kua 145 hnenah Rs. 56,14,200 sem a ni.

Enfiah tur awm lo
Tripura Bru transit camp-a Mizoram Bru-te Mizorama lak lêtna turah Khakchangpara camp-a mite chu nimin khan enfiah tum leh a ni a, mahse inenfiahtir tura inlan an awm lo.

Heroin man
Excise & Narcotics department-a Anti-Narcotics Squad chuan nimin tlai dar 4 khan Vaivakawn Zohnuaiah Changi (35) d/o Hmun­kara, Tahan C Group, Myanmar inti hnen aṭangin heroin gram 15 an man. Ruihhlo neitu hi ND&PS Act, 1985 hmangin thubuai an siamsak.

Inzai theih dawn
Aizawl Civil Hospital-a Surgical Operation Theatre leh Ortho Operation Theatre-te chu vawiin aṭangin hman theih a ni leh tawh dawn a; Dental OPD chu building chung chhawng sang berah sawn a ni bawk.