Hri veite in lama inen-kawl theih dan sawiho

Health minister Dr R Lalthangliana hoin nimin khan Secretariat conference hall-ah Covid-19 vei, harsatna nei lo (symptom nei lo)-te in lama inenkawltir chungchang an rêl a, ngaihtuah nawn atan an dah.

'Covid-19 positive, asymptomatic-te chungchangah an din­hmunin a tlin a, khawtlang hruaitute pawhin rem an ti a nih chuan, in lama inenkawl (home isolation) kalpui hi a ṭha zawk em?' tih sawiho a ni a; uluk taka zir chian a nih hnuah rawtna siam a, ngaihtuah leh atan an dah. SOP for Children under 18 on Covid-19 siam a nih thu leh sorkar pawmpuina dil mek a nih thu tarlan a ni.

Meeting-a tarlan danin, Aizawla partial lockdown kalpui mek chhungin Covid-19 inkài chhàwnna khaidiat (transmission chain) chhut chah hman beisei a ni a; chumi tur chuan contact tracing team, sample collecting team leh ZMC laboratory-a thawkte'n chhun zan zawmin hna an thawk ṭhin.

Positive tharte an chhui chiannaah, hripui vei zinga a tam ber chu mipuite fimkhurna kawnga an inthlahdul deuh vangah an puh.

Tun hnaiah Covid Care Centre (CCC) atan mi 480 awm theihna tur BSUP building, Durtlang leh mi 80 enkawlna tur Women's Polytechnic Hostel old building, Durtlang chu a hmunah kalin enfiah a ni a, a ṭul anga hmalak chhunzawm tum a ni.

Kohhran leh YMA ṭhenkhatin an hmunhmate CCC atana hman an phal thu dawn a ni a, MZU pawhin an hmunhma ṭhenkhat hman an remti bawk a, vawiinah Health Minister hoa endik a ni ang.