MIZOFED-in nuai 242.29 an hlép

MIZOFED chuan nimin khan Synod Con­ference Centre-ah Annual Assembly vawi-19 na an hmang a; Cooperation minister Lalrinmawia Ralte-in a hmanpui. MIZOFED-in kum kal ta chhungin cheng nuai 242.29 an hlêp tih tarlan a ni.

Assembly hi MIZOFED chairman K Laldawngliana'n a kaihruai a; Lalrinmawia Ralte chuan, MIZOFED-a thawkte chu anmahni dawrtu apiang ṭha taka dawngsawng turin a chah a, Mizote chu thil ti thei tak an ni tih hre reng a, an tih lamah tlin taka ti turin a fuih.

MIZOFED Assem­bly-ah hian kum 2004 aṭanga tun thlengin MIZOFED chu hlawkna neiin a kal tih an sawi a; kum 2014-15 chhunga an hlêp zawng zawng chu cheng nuai 242.29 a nih thu an tarlang.

MIZOFED hian hmun pasarihah petrol pump an nei a, hmun parukah gas agency an nei. Ei chawp dawr hmun pali-ah an neih bakah, society share nei mi 294 an awm bawk.