Zorama'n remna a zawn dan a sawifiah

MNF president Zoramthanga chuan nimin khan Mizo Hnam Rûnah tun hnaia sorkar laipui leh Manipur hel pawl hrang hrang inzawmkhawm, United Peoples' Front (UPF) hotute'n Suspension of Operation (SoO) an ziahnaa a telpui chung­chang a sawi.

Zoramthanga chuan, inbiaknaah HPC(D)-ten Mizorama khaw 31-a V/C inthlan an dodalna chu an sût tur a nih thu ṭum thum vel a sawi lang niin a sawi a, "UPF-a tel HPC(D)-te’n Mizoram chhung khaw 31-ah inthlan an khap hi an sût lo a nih chuan he inbiaknaah hian MNF chu tel zui thei din­hmunah a ding tawh dawn lo tih ka sawi a ni," a ti.

MNF President chuan, "Remna palai hna thawk tura intâtlut chawp anga Congress party-in min puhnate hi an hriat loh luat vang a ni. Manipur helte Central-a Congress (UPA) sorkar khan kum ruk chhung ‘cease fire’ ringawtin a lo hnûk kual vel mai mai a, an beidawng hman hle,” a ti a; Congress party chu rin thu tlem belh chawpa thu dik lo puangzarah a puh.

Zoramthanga sawi danin, NDA a sorkar hnua UPF-te'n telephone aṭang leh hmaichhana an ngen ṭhin angin, Ministry of Home Affairs-ah a thlensak a; inkahhai ringawta kal chuan buaina a tihreh loh avangin, inrem tak takna turin ‘political talk’ level tihsan an tum a ni.