Mizorama blood bank-te endik tan a ni

Central Drug Standard Control Organisation (CDSCO) hotute chuan, nimin aṭang khan Mizorama blood bank ṭhenkhat an endik ṭan a; a bul ṭan nan nimin khan Synod Hospital blood bank an endik.

Mizorama blood bank hrang hrangte endik tura rawn kal hi CDSCO (Eastern Zone)-a drugs inspector SPN Singh a ni a; Mizoram sorkar aṭangin Health department assistant director (Food & Drugs) R Vanlalsiama leh MSACS-a quality manager Lalhmingliani Pachuau ten an ṭawiawm.

CDSCO drugs inspector-in nimin zinga Synod Hospital blood bank a enfiahnaah blood bank officer-te'n an lo dawngsawng a, blood bank pindante leh hmanraw hrang hrangte a enfiah a ni.

Thu dawn danin, CDSCO drugs inspector chuan Synod Hospital blood bank pindan chu zim deuha a ngaih avangin tizau turin a ràwn a; blood component separator (thisen thliarna) bik atana licence pek dan tur an buaipui chhungin blood bank room chu lo tizau turin a hrilh. Synod Hospital hian July 2014 khan blood component separator an hmang ṭan a ni.

Synod Hospital blood bank officer-te chuan, tuna an blood bank-in whole blood bik atana licence an neih chu kum 2017 thleng dam tur a nih thu an sawi a; blood component separator atan bika licence pawh an hmuh ngei an beisei thu leh, CDSCO hotute duh dan anga hmalak an tum thu an sawi.

CDSCO drugs inspector SPN Singh leh amah ṭawiawmtute hian Mamit District Hospital-a blood bank enfiah turin nimin chawhnu khan Mamit an pan a; Mamita blood bank an enfiah hnuah Kolasib District Hospital blood bank an pan ang. Chumi hnuah Champhai District Hospital leh Serchhip District Hospital-a blood bank-te an endik leh dawn a ni.