Sum hman dan enpui turin NGO-te sáwm

Mamit District Level Vigilance and Monitoring Committee chu nimin khan Mamit DC conference hall-ah an ṭhukhawm. Committee co-chairman Ronald Sapa Tlau, Rajya Sabha MP chuan sorkar laipui aṭanga hma­sawnna sum hmuhte dik taka hman a nih leh nih loh vênpui turin tlawmngai pawlte a sâwm.

Ronald Sapa Tlau chuan, hmasawnna fawng chelh tak taktu chu district-a hnathawka awmte an ni tih sawiin, "Mahni hnathawhna hmun nuam ti a, taima leh ṭhahnemngai taka hna thawh hian kori a tù a ni. Hnûhma ṭha hnut­chhiahtu leh a ṭha zawnga danglamna thlentu, hlemhletna laka fihlim mi ni tum ngam tlat ang che u," tiin officer-te a fuih.

Meeting-ah hian Mamit DRDA project director K Lalhming­liana'n report a pe a; kum 2014-15 chhungin MGNREGA hnuaiah job card nei mi 20,188-te tan ni 23 inhlawhna siam a nih thu te, kum 2015-16 ah job card nei mi 20,188-te tan ni hnih inhlawh siam a nih tawh thute a tarlang.

Mamit CMO Dr Hmingthanmawii tarlan danin, kum 2014-15 chhung khan Mamit district-ah sikserh avang­in mi pasarih an thi a; sorkar kum kal mekah sikserh vangin mi pathum an thi tawh bawk.

Mamit Power & Elec­tricity division-in an enkawlna hnuaia khaw 84 awmte chu RGGVY hnuaiah eng an pe vek tawh a; thawm ṭhat ngai awmte chu department-in a bawhzui mek niin an sawi.