AMC-in Property Tax a khawn ṭan ta

Aizawl Municipal Council (AMC) chuan nimin aṭang khan Aizawl khawpui chhungah in leh ram chhiah, Property Tax an khawn ṭan.

Property Tax hi AMC Ward I-a veng pahnih - Dur­tlang leh Leitan local council huam chhung­ah khawn ṭan a ni a, AMC-a hnathawkte'n an kal chilh. Tun kar chhungin Durtlang leh Lei­tanah an khawn ang a; chumi zawhah veng dangah an khawn leh ang. Property Tax khawn ni hmasa berah hian AMC executive coun­cillor (Revenue) Hming­thanzami leh Lalzirliana bakah, bialtu councillor Lalrinenga Sailo ten an ṭawiawm a ni.

AMC Ward I-ah hian veng paruk - Selesih, Durtlang North, Durtlang, Durtlang Leitan, Zuangtui leh Muanna Vengte a awm a; survey an neih tawh ang chuan property (in leh ram) 4,970 a awm.

AMC hotute chuan, Property Tax khawn dan leh a chhût dan chu thil thar a nih avangin mipui lamin harsatna eng emaw an nei dawn tih hre chungin, mipui phurrit lo thei ang ber turin an kalpui tih an sawi a; The Mizoram Municipalities (Property Tax Management) Rules, 2014-in a sawi angin, chhiah pek tur zat chu mipuite'n anmahniin an chhût lâwk thei tih sawiin, "Mahni inchhût lâwk a ngaih avangin duhthusam ang takin chhiah pek a kal chak thei lo," an ti.