Lungleiah Bru lâk kîr dan tur sawiho
Nimin khan Lunglei DC Ashish Madhaorao More hoin a pisaah Tripura aṭanga Bru lak lette, Lunglei district-a dah an nih hnua enkawl zui dan tur sawiho a ni a, OSD (Home) David H Lalthangliana pawh a tel. Lunglei district-a khaw panga - Putlungasih, Zohmun, Buknuam, Dinthar leh Chawilung ‘S’ khuaahte Bru lak lette dah tum a ni.
Meeting-ah hian, Bru lak let dan tur leh lak let hnua Lunglei district-a an awm zel dan tura hmalak tawhnate thlirlet a ni a; Lunglei DC chuan, Bru-te dawngsawng turin an inpeih thawhkhat tawh thu a sawi.
Lunglei district-a Bru dahte vil tur bik liaison officer pakua an ruat a, anni bakah supporting staff pariat leh administrative officer panga ruat belh a ni.
Lunglei additional SP Jerome Lalmuankima chuan, Bru chhungkua lo kîrte venhimna lam leh him dam taka an khua ṭheuh an thlen theih nan police-in ruahmanna engkim an peih tawh thu a sawi. Lunglei CMO Dr VLMS Dawngliana'n medical team leh damdawi lam pawh an inpeih tawh thu a sawi bawk.
Lunglei district-ah hian Bru chhungkua 233 dah tura ruahman a ni a; Putlungasih-ah chhungkaw 91, Zohmunah chhungkaw 36, Buknuamah chhungkaw 11, Dintharah chhungkaw 81 leh Chawilung ‘S’ ah chhungkaw 14 dah tum a ni.