Kolasib-ah World Blood Donor Day hmang

Nimin khan Kolasib District Hospital conference hall-ah World Blood Doner Day hman a ni a, Kolasib DC Jitender Yadav khuallian a ni. Sorkar kum kal ta 2014-15 chhung khan Kolasib damdawi-in aṭangin chawhrualin thla tin thisen unit 46 pe chhuak ang a nih thu an tarlang.

DC Jitender Yadav chuan, "Tun hnaiah Kolasib-ah vantlang aurinna hmanga hmanhmawh taka thisen mamawh a nih thu au thâwm hriat tur a awm ṭhin. Hei hi blood bag neih loh vanga thisen awm loh vang a ni thei," a ti a; vantlang aurinna hmanga au a ngaih loh theih nan thisen petute adress leh telephone number chhinchhiah a, rîkrum thilah pawh thisen pe tura ngen mai ṭhin ṭha a tih thu a sawi.

Blood bank officer Dr C Vanlalhlimpuia'n report a pek danin, YMA sub-headquarters, Kolasib leh Kolasib Electric Veng branch YMA ten thisen dawngtute tan unit 10 atan Rs. 5,500 ve ve an pe tawh a; April 2014 - March 2015 chhungin Kolasib Hospital blood bank-in thisen unit 501 an dawng a, chung zinga 94.70% chu a thlawna pek a ni.

Kolasib-a World Blood Donor Day hmannaah hian kum 2014-15 chhunga tlawmngai pawl, kohhran leh zirna-in hminga thisen pe tamte hnenah lawmman hlan a ni a; thisen pe tam berte chu - NGO zingah Zampuimanga Group YMA, zirna inah CZ Higher Secondary School leh kohhran zingah Vairengte Branch KṬP-te an ni.