Mamita NGO-te'n officer haw tur an dang
Mamita Joint Village Council, tlawmngai pawk hrang hrang leh damdawi dawr neitute chuan, nimin khan Mamit CMO pisaa assistant director (Food & Drugs) Sarah Laldintluangi chu thlaktu awm loa Serchhipa sawn a nih vanga lungawi lohna lantir nan Mamit a chhuahsan tur an dang.
Mamit Joint VC chairman P Lalthara chuan, Mamit district hmasawnna tura theihtawp chhuah a nih laia an neih sa laksak zawnga tih a ni ṭhin chu pawi a tih thu a sawi a; Mamit CMO pisaa assistant director (F&D) chu a thlaktu tur sorkarin a dah hma chuan Mamit a chhuahsan theih loh nan hma an la dawn niin a sawi.
MZP headquarters, Mamit president Lalropuia chuan, Mamit district-a sorkar hnathawk, thlaktu awm loa hmun danga sawn an ni ṭhin chu vanduaithlak an tih thu a sawi a; pawl dang hruaitute pawhin thu an sawi bawk.
NGO-te chuan Health department assistant director sawnna thupek chu sût turin sorkar an ngen a, sût a nih loh pawhin, amah thlaktu tur dah nghal turin an phût.
Mamita an punkhawmnaa an sawi danin, Health department chuan April 7, 2015-ah Lunglei CMO pisaa thawktu pakhat chu Mamita awm turin an sawn a, mahse tun thlengin Mamitah a la zawm lo. Sorkarin April 25, 2015-ah notification dang tichhuak lehin, Sarah Laldintluangi chu Serchhipa awm tura tih a ni.