Fimkhur thilah SEC pisa khâr

State Election Com­mission (SEC)-a thawk zinga pakhatin Covid-19 a vei tih hmuh chhuah a nih avangin fimkhur thilah SEC chuan nimin aṭang khan an pisa an khâr.

SEC hotute hnen aṭanga Vanglaini thu dawn danin, an pisaa thawk zinga pakhat, Salem Venga mi, local task force-a inhmang tak chuan Covid-19 a vei tih September 13, Pathianni khan hmuh chhuah a ni a; hei vang hian Health department aṭanga thurâwn an hmuh angin fimkhur thilah an pisa an khâr ta a ni.

SEC-a thawk zinga hripui vei ta hi Salem Veng LTF-a a inhmanpuite zingah Covid-19 vei an awm avangin inah a inkhung a, September 8, 2020 aṭangin pisa a kai zui lo. Hetih lai hian, SEC-a thawk zawng zawng chu Rapid Antibody Test hmangin September 10 khan endik an ni a, Covid-19 vei hmuh chhuah an awm lo.