Inthlanah Dy.CM-in lawmthu sawi

UDPA enkawltu deputy chief minister Tawnluia chuan, Aizawl Municipal Corporation (AMC) chhunga local council inthlan, August 27, September 4 leh September 11-a neih chu buaina leh harsatna lian tham awm loa zawh a nih avangin lawmawm a tih thu a sawi.

Tawnluia chuan, Covid-19 léng karah voter 63.45%-in an vote thlak a, result chiangkuang leh felfai taka puan a ni thu sawiin, "Hetiang inthlanna felfai leh muanawm tak kan neih theihna atana hma latu State Election Commission leh inthlanna a thawktu te, dan leh thupek kengkawhtu, inthlanna thianghlim leh felfai tak a awm theihna atana ṭhahnemngai taka thawktu MPF leh vote thlaktu mipui hnenah local council enkawltu minister ka nihna leh department hmingin lawmthu ka sawi a ni," a ti.

Dy. Chief Minister chuan, LC member atana thlan tlinte lawmpuina a hlan a, mipui beiseina anga an mawhphurhna kengkawh thei turin duhsakna sang ber a hlân a ni.