AMPEDA-in FIR an thehlut

All Mizoram Petroleum Dealers' Association (AMPEDA) chuan, September 12, 2020 zan dar 10:30 velah AMPEDA member tanker 12-te Lailapur-ah mi ṭhenkhatin an lo beih chungchangah nimin khan Aizawl SP hnenah FIR an thehlut.

AMPEDA hian FIR hi an president K Lalnghakliana hmingin an thehlut a; September 12, Inrinni zanah hian Silchar Truck Drivers' Association mi leh sa nia hriatte'n Mizoram tanker 12 an beih thu leh, tanker khalhtute leh a puitute pawh kut an thlak thu an tarlang a ni.

FIR-ah hian AMPEDA chuan, tanker khawihtute leh driver-te kutthlaktute chu man chhuaha hrem an phût thu te, tanker an tihchhiatte chu a siamṭhatna senso tumtir an phût thu te, tun hnuah a thlen tawh loh nan tanker enkawltute himna ngaihtuahsak tura an duh thute an tarlang bawk.