Covid-19 negative tawhin a kai nawn CCC atanga a chhuah hnuah ZMC-ah dah luh a ni

Covid-19 vei mi pakhat, Covid Care Centre (CCC), ITI Venga enkawl, RT-PCR hmanga endiknaa hripui vei tawh lo (negative tawh) tih finfiah a nih hnua CCC aṭanga chhuahtir tawh chuan Covid-19 a vei leh tih a hnuah finfiah leh a ni a, ZMC-ah dah luh a ni.

Hetihlai hian a chenpui a nu pawhin Covid-19 a vei tih hmuh chhuah a ni a, an nu-fa hian ZMC-ah enkawl mek an ni.

Covid-19 negative hnua positive leh ta chhungte hnen aṭanga thu dawn danin, an nau hi Kolkata aṭangin August 10, 2020-ah a rawn haw a, quarantine facility-ah dah nghal a ni. August 17-ah RT-PCR hmangin a swap sample endik niin, Covid-19 a vei tih finfiah a nih avangin CCC-ah dah luh a ni a, Covid-19 symptom a nei lo.

CCC-ah pawh symptom a nei lo zui zel a, August 30-ah RT-PCR hmanga endik nawn a ni a, a negative tih hmuh a ni. Hei vang hian August 31 khan CCC aṭangin thuneitute'n an chhuahtir.

CCC aṭanga a chhuah hnu September 4-ah khuh leh khawsik a nei a, mahse, a hma lawkin Covid-19 negative tih finfiah tawh a nih avangin a positive leh ang tih inrinhlelhna an nei tawh lo a, hritlang khawsik pangngaiah an ngai. A khawsik a reh loh avang leh in lama inkhung hran hun a tàwp dawn hnaih avangin doctor-te thuràwn angin State Referral Hospital (ZMC)-ah dah luh a ni.

SRH-ah hian an test nawn leh a, September 9 khan Covid-19 a vei tih finfiah leh a ni a, tunah erawh chuan a dinhmun a ṭha tawh. 

Hetihlai hian a nu chuan hripui hi a kai ve bawk tih hmuh a ni a, symptom a nei lo a; ZMC-ah an nu-fa hian an awm mek. A fanu atanga kai a nih leh nih loh erawh finfiah a ni lo.

 CCC aṭanga an fanu a chhuaha in lama a inkhung chhungin a chhungte páwn lamah an chhuak ngai lo tih thu dawn a ni.