Outlook central univ. ṭha zingah Mizoram University 11-na a ni
Outlook chanchinbuin kum tina an tih ṭhin anga kumina zirna-in ṭha a thlannaah Mizoram University chu India ram pumah university ṭha 58-na a ni a, central university bikah chuan 11-na a ni.
India rama university ṭha ber atana Outlook-in a thlan chu Indian Institute of Science (IISC), Bangalore a ni a, Jawaharlal Nehru University (JNU), New Delhi-in a dawt. JNU hi central university bik zingah chuan university ṭha berah an thlang a, MZU chu 11-na niin, Mizote luh tamna North Eastern Hill University, Shillong chu 10-na a ni.
Central university zingah hian hmarchhak biala university zingah chuan Tezpur University, Assam sang berin, pasarihna a ni a, NEHU leh MZU-te'n an dawt. A ṭha zual 25 zingah hmarchhak state aṭangin Assam University, Silchar (15-na), Tripura University, Agartala (20-na), Sikkim University, Gangtok (21-na), Central Agricultural University, Imphal (25-na)-te an lang bawk. Hetih lai hian, university zawng zawng zingah chuan hmarchhak state-a ṭha bera puan chu Gauhati University, Guwahati (state university) a ni thung.
State university zingah Jadavpur University (JU), Kolkata chu pakhatna a ni a, Calcutta University-in a dawt; JU hi a pumpuiah pathumna a ni. Technical zirna bikah Indian Institute of Technology (IIT) - Madras, Chennai chu pakhatna a ni a; medical zirnaah All India Institute of Medical Sciences (AIIMS), New Delhi chu pakhatna a ni.
Outlook-in university ṭha a thlannaa tehfung atana a hmante chu - academic & research excellence, industry interface & placement, infrastructure & facilities, governance & admissions leh, diversity & outreach tihte a ni.
Outlook central university ṭha zualte
Rank University Khawpui State/UT
1 Jawaharlal Nehru University New Delhi Delhi
2 University of Hyderabad Hyderabad Telangana
3 Banaras Hindu University Varanasi Uttar Pradesh
4 University of Delhi New Delhi Delhi
5 Jamia Millia Islamia New Delhi Delhi
6 Aligarh Muslim University Aligarh Uttar Pradesh
7 Tezpur University Tezpur Assam
8 Visva Bharati University Santiniketan West Bengal
9 Pondicherry University Puducherry Pondicherry
10 North Eastern Hill University Shillong Meghalaya
11 Mizoram University Aizawl Mizoram