Covid-19: Mizoram dinhmun Sept. 13-ah mi 14 hmuh belh

September 13, Pathianni khan Mizo­ramah Covid-19 hripui vei mi 14 hmuh chhuah a ni a, hripui vei hmuh chhuah tawh zawng zawng chu mi 1,428 an ni. Nimin khan hripui vei zinga dam tawh mi 89 chhuahtir an ni thung.

Pathiannia hripui vei hmuh chhuahte chu - ZMC laboratory-a RT-PCR hmanga hmuh chhuah mi 11, Saitual Hospital-a TrueNAT laboratory-a hmuh chhuah pahnih leh Rapid Antigen test hmanga Kolasib district-a hmuh chhuah mi pakhat an ni.

Nimin khan hripui veite enkawlna hmun hrang hrang aṭangin mi 89 an chhuak. Thingdawl CCC aṭangin hnam dang driver/handyman 72, State Referral Hospital aṭangin mi pasarih, AYUSH Hos­pital CCC, Thenzawl aṭangin mi paruk, Zokhawsang CCC leh Mamit DCHC aṭangin mi pahnih ve ve chhuahtir an ni.

Nimin tlai dar 5 thleng dinhmun angin, Mizorama Covid-19 vei hmuh chhuah tawh mi 1,428 zinga mi 917 (64.36%) chu chhuahtir an ni tawh a, mi 511 (35.64%) an la chhuak lo. La chhuahtir loh zingah hripui vei tawh lo (negative tawh) an awm nual bawk. 

September 13 khan ZMC-ah mi 889-te swab sample endik a ni a, Covid-19 vei mi 11 hmuh chhuah niin, mipa pasarih leh hmeichhia pali, kum 11-40 inkar an ni. An zinga mi pariat - Republic Veng, Mission Vengthlang leh Chawlhhmun mi pakhat ṭheuh, Salem Veng mi pahnih leh Khatla East mi pathum an ni a; Khatla East venga mi zingah Covid-19 symptom nei pakhat a awm.

ZMC-a hmuh chhuah dangte chu Tachhip, Lengpui leh Rûlchàwm khaw mi mipa pakhat ṭheuh niin, mahni ina inkhung lai vek an ni a, state páwn aṭanga rawn haw niin, taksaa harsatna nei an awm lo.

Saitual Hospital laboratory-a TrueNAT-PCR hmanga mi 17-te swab sample endik zingah Covid-19 vei mipa puitling pahnih hmuh chhuah a ni a, Chennai leh Andra Pradesh aṭanga rawn haw niin, khung hran mek ve ve an ni.

Pathianni vêk khan Bairabi entry point-a RAT hmanga swab sample endik zingah Assam lam mi mipa pakhat Covid-19 vei hmuh chhuah a ni a, symptom a nei lo.

September 13-a TrueNAT-PCR hmanga Lunglei Civil Hospital-a endik mi paruk leh Serchhip District Hospital-a endik 16 zingah hripui vei hmuh a ni lo a; RAT hmanga Serchhip leh Mamita endik zingah hmuh chhuah a ni lo bawk.