Ruihhlo doin sorkar leh YMA thawkho Milian leh mite kan thliar dawn lo - HM Zira

Central YMA leh Mizoram sorkar hnuaia police leh excise-te'n a huhoa ruihhlo an dona tur chu nimin khan Vanapa Hall-ah hawn a ni. Khuallian Home minister R Lalzirliana chuan ruihhlo dona kawngah milian leh mite thliar hran an nih dawn loh thu a sawi.

Inkhawm hi Central YMA vice president Vanlalruata'n kaihruaiin, Home Minister chuan, "Mi lian leh mite thliar loin dan bawhchhia chu dan hmangin an chungchang kan ngaihtuah zel dawn. Dan hnuaiah milian leh mite an awm lo. Zu leh ruihtheih thil avanga mi dang tana harsatna siamtute chungah sorkarin khauh takin thununna a lek dawn," a ti.

R Lalzirliana chuan, "Dan loa thil titute'n kan ṭhalaite nunna an lak zel dawn chuan dan hrulah engkim a tih theih a ni lawm ni tih hi YMA lama kan ngaihtuahna chu a ni," a ti a, dan chu awm mah se, kan hnam a bopil ai chuan dan hrula thuk taka kal a thlanawm zawk thu a sawi.

HM Zira chuan ruihhlo zuartute chu rang taka inthiarfihlim turin a hriattir a, "Sum in neih avanga in suma intlanchhuah theih a nia in inngaih lai hian, ruihhlo avanga tuar kan nau, kan ṭhiante chhanchhuak tur hian engkim huamin, an hmaah kan rawn ding dawn. Dan pawisa loa, kan hnam boral pawi ti loa, in tilui a nih chuan in chungah engpawh thleng se in mawh a ni ang," a ti.

Sorkar phalnaa zu zawrh chungchang sawiin R Lalzirliana chuan, "Zu hi dan hnuaiah kan zuar reng lo mai thei, study group-te insiamin kan han zir chiang a, thuthlukna thar pawh a la awm thei e. Mah se, sorkar phalnain kan zuar emaw, zuar lo emaw, zu in duh kan awm chhung chuan zu hi a rem dawn chuang lo," a ti a, zu khap bur lai pawhin in tur a awm reng thu a sawi.

Home Minister sawi danin, ruihhlo dona atan hian Mizoram sorkar chuan CYMA hnenah cheng nuai 30 a pek bakah, an budget pawn lam aṭangin police hnenah cheng nuai 70 leh excise hnenah cheng nuai 30 a pe dawn a ni.

Inkhawmah hian CYMA president Lalbiakzuala, DGP Thianghlima Pachuau leh Excise commissioner Lalhmunsangate pawhin thu an sawi.

Lalbiakzuala chuan ruihhlo doa ke pen chhuah a nih chuan inti fel tak tak human rights buaipuitute an lo lan dawn thu sawiin, "Anni hi chhungkaw tam tak leh ram tana harsatna thlentute dikna chanvo nge mipuite chan-vo hi ngaih pawimawh awm zawk tih ka zawt a ni," a ti a; thil tisualtute khawngaihthlakna aia an thil tihsualte thlir zawk turin roreltute a ngen bawk.

Thianghlima Pachuau chuan Mizoramah hmun dang aṭanga ruihhlo a luh nasat thu sawiin, "Ruihhlo avangin crime rate a san phah a, ṭhalaite'n nunna an chan phah tam hle. Act East Policy a hlawhtlin hunah phei chuan tun aia nasa lehzuala ṭan lak a ngai dawn a ni," a ti.

Lalhmunsanga chuan Excixe & Narcotics department-ah thawktu an tlem avangin theih-tawp an chhuah chung pawhin an indaih lo hle tih sawiin, "Police leh YMA tel loin kan kal tak tak thei lo," a ti a, YMA leh police-te nena thawhhona avangin Mizoram chuan ruihhlo do kawngah state dang aiin fak a hlawh thu a sawi.

Thawhhona thuthlung ziak nghal a ni a, Home Minister hriatpuina hnuaiah CYMA aiawhin President, Mizoram Police aiawhin DGP leh Excise & Narcotics dept. aiawhin Com-missioner-in hming an ziak.

Inkhawm zawh hian Mizoram Police-in ruihhlo chi hrang hrang an man cheng vbc. 1.2 man hu chu Home minister R Lalzirliana hoin Mualpuia 3rd Bn. MAP playground-ah hal ral a ni.

CYMA, Police leh Excise thawhhona thuthlung

• Mizorama ruihhlo hluar lutuk tihrem nan, sorkar (police/excise) leh YMA thawhho nise, ruihhlo zuartute leh a ti ṭhinte man chhuah a nih theihna atan YMA, police leh excise-te a ṭul anga inpuitawnin, chak taka hma lak a ni ang.

• Mizoram chhunga ruihhlo lo luhna kawng hrang hrangte uluk taka vilin, a phurh nana hman lirtheite police/excise-in surprise check an nei ṭhin ang.

• Sorkar dan palzuta, ruihtheih thil leh a kaihhnawiha inhnamhnawih ṭhinte chu YMA leh police/excise duty-te'n manin, thlei bik awm loin an phu tawk hremna pek tura hmalak a ni ang.

• Aizawl bikah chuan ruihhlo hluar zualna laiah tun aia chakin police, excise leh YMA ten hma an la ang.

• Ruihhlo dona kawngah, sum leh pai ṭul angte phuhruk nan a ṭul anga sawihoa, inpui dan zawn zel a ni ang.

• Ruihhlo-in a tihbuaite chhanchhuahna kawnga nasa zawka hma lakho nise.

• He thawhhona thuthlung hian Mizoram chhunga police, excise leh YMA awmna khua leh veng zawng zawng a huam ang.