KHAWTHLIR

Thisen pe

Thingsul Tlangnuam Branch YMA chuan nimin khan an YMA Hall-ah blood donation camp an huaihawt a, Aizawl Civil Hospital tan mipa 30 leh hmeichhia pahnihte'n thisen unit 32 an pe.

Teachers Day-ah thil zawrh loh rel

Serchhip District Committee for Celebration of Teachers' Day chu nimin khan an chairman, DC Dr. Lalrozama hoin a pisa-ah an ṭhukhawm a, zirtirtu harsatna tawkte
ṭanpuina sum tuakna atan thil zawrh ni tawh lo se, zirtirtu pakhatin Rs 50 ṭheuh thawhin, zirlaite hnenah tihluihna tel loin an rem chan dan anga thawh ve tura ngen nise, an ti.

Building hawng

Rs. 4,50,000 senga sak Bilkhawthlir Anganwadi Centre IX building chu Ningani khan bialtu MLA K Lalrinthanga'n a hawng a; naupangte'n nuam ti taka an inzirna atan worker leh helper-te an pawimawh thu a sawi.

Anthurium Festival

Tourism secretary V Lalremthanga hoin nimin khan a pisa-ah kumina Anthurium Festival hman dan tur sawiho a ni a, festival hmanna atan hian sorkar laipuiin cheng nuai 25 a rawn pek thu tarlang a ni.

Dan chhunzawm

Mara Student Organisation (MSO), Siaha HSS branch chuan an sikul building sak ṭhat leh Mizo leh Sericulture subject atana zirtirtu dah an phut avanga August 3 aṭanga an sikul leh DC office leh a chhehvel office kai turte an dan chu nimin khan an chhunzawm. Thudawn danin, MSO hian sikul kai tur leh pisa kai tur dan hi an thil phut a hlawhtlin hma chuan chhunzawm an tum a ni.

NLUP sem

Soil & Water Conservation department chuan, Ningani khan Champhai I&PR auditorium-ah NLUP hnuaia hmunphiah chin thlangtu
chhungkaw 12 hnenah Rs. 31,780 ṭheuh leh coffee chin thlangtu
chhungkaw 10 hnenah Rs. 13,600 ṭheuh an hlan.