YMA, police leh excise-te'n a huhoa Ruihhlo an dona tur hawn a ni

Nimin khan district khawpui hrang hrangah YMA, excise leh police-te'n a huhoa ruihhlo an dona tur hawn a ni a, Lungleiah chuan Sub. Hqrs. YMA confe-rence hall-ah hawn a ni.

Khuallian DC Abhijit Vijay Chaudhari chuan Excise & Narcotics department chhut danin kuminah drugs avangin Mizoramah mipa 35 leh hmei-chhia 7 an thi tawh atih sawiin, "International boundary leh golden triangle hnaih a awm kan nih avangin Mizoramah drugs tam tak tawlh ruk a ni a, ṭhalai ten an hman sual phah," a ti a, thawhhona thuthlung hi a hlawhtlin theih nan mi zawng zawng ṭanrual a ngaih thu a sawi.

Thusawitu dang Lunglei SP Zosangliana chuan YMA, police leh excise chuan kum 30 chhung ruihhlo an do tawh thu sawiin, "International boundary hrul a awm kan nih avang leh
ṭhenawm state aṭanga ruihhlo tam tak a rawn luh ṭhin avangin ṭhalai tam tak ten nunna an chan phah a ni. Kum 2007 leh 2016 chhungin drugs kaihhnawih ah mi 1935 man niin, mi 1954 lakah thubuai a ni," a ti.

Champhaiah chuan a huhoa ruihhlo dona tur hi DK Traffic Point-ah hman a ni a, khuallian DC Vanlalngaihsaka ruihhlo hi mitin hmela a nih avangin ruihhlo do kawngah tumah ralbang thei an awm loh thu a sawi.

Thusawitu dang, Champhai Sub-Hqrs YMA president C Lalbiakzauva chuan sorkar leh YMA ten ruihhlo do kawnga ṭan ho na tur ṭha tak an duangchhuak chu lawmawm a tih thu sawiin, "He thawhhona hian ṭan rual hlawk zia a tih lan ngei ka beisei," a ti a, ruihhlo zuartute an phu tawk hremna pek hi human right bawhchhiatna a nih chuan, ruihhlo zuarte'n mi nun tichhiaa an right an bawhchhiat sak chu a let sawm ai pawhin a man a sang zawk tur thu a sawi.

A huhoa ruihhlo dona tur hi Lawngtlaiah chuan Areopagy-ah hawn a ni a, khuallian LADC CEM VL Hmuaka chuan, "Ṭhalaite nun tichhe nasa bertu leh sual dang tipunluntu ruihhlo hi inlungrual taka do a ṭul a ni," a ti a, ram leh hnam dam nan, ruihhlo ti ṭhinte leh zuar ṭhinte chu a hrem theitute hnena report zel thin turin mipuite a sawm nghal a ni.

Lawngtlai SP F Lalsanglura pawhin thu sawiin, "Lawngtlai district-in hmasawnna kawng a zawh zel a, chu chuan sual a rawn ken tel zel dawn avangin tun hi kumpuan bawhzui hun tak a ni. Ruihhlo hi mi mala do chi a ni lo a, a huhova do chi a ni. Ram ropui tak tak tibuai tawhtu ruihhlo lakah chuan kan lo inven loh chuan keini pawh min zuah bik lo ang," a ti.

Serchhipah chuan DC con-ference hall-ah a huhoa ruihhlo dona tur hi hawn a ni a, khuallian Serchhip DC Dr. Lalrozama chuan, "Ruihhlo hi a huatthlala a, nun ti chhetu, ram leh hnam hmelma, ralpui phiara phiar ngai a ni," a ti a, ruihhlo donaah tha thlah loa, ṭan mang reng a pawimawh thu a sawi.

Serchhip SP Lalringdika pawhin thu sawiin, "Kristian ram nisi he ti taka ruihhlo in min tibuai hi a lungchhiat thlak hle. Ruihhlo hian ruk ruk, inrawk leh sualna dang tam tak a hrin belh ṭhin avangin ruihhlo ngai nei lo chhungkua zawng zawngte pawh min tibuai vek. Kan hnam hmelma a ni," a ti.