Phalna nei loa hostel din phal tawh lo

Education dept. chuan nimin khan an conference hall-ah Aizawl khawpuia hostel neitute 'Mizoram School Hostel Infrastructure, Facilities and General Care of Students (Management) Rules 2016' an hrilhfiah a, phalna nei lo tan hostel din phal a nih tawh loh thu an sawi.

Hostel Rules hi Council of Minister chuan ni 29.03.2016 ah pawmpuiin Govt. Gazette-ah chhuah a ni a, ni 01.06.2016 atanga hman tan a ni. Rules hian class I aṭanga class XII, sikull naupang 10 nei chin hostel a huam a, hostel mal din leh sikul behchhante pawh a tel. College zirlaite chu a huam lo.

Rules ang chuan Hostel neiturin December, 2016 ral hmain Hostel Managing Committee din a ngai a, committee chu hostel enkawlnaa mawhphurtu tur leh hostel vilzuitu tur an ni. Hostel-a awm zirlaite medical, academic, moral leh spiri­tual guidance-te record tur a ni.

Education department aṭanga permission leh recognition nei lote tan hostel din phal a ni tawh lo a, hostel lo din tawh sate chuan DEO kaltlangin permission leh recognition Education Director-ah dil tur a ni a, kum 2 chhungin danin a phut te zawm tura beisei an ni. Permission an dil hnuah provisional recognition pek an ni ang a, kum hnih hnuah recognition chu pek leh an ni ang. Recognised hostel-te chu kum hnih hnuah an renew zel ang.

Hostel hian chhiatna leh vanduaina thlen theih maina hmun, leimin hlauhawm, boruak bawlhhlawh leh lirthei tawtna hmunahte din loh tur a ni.

Study room, dining room, recrea­tion room, bathroom, toilet leh dormitory tha takte a awm tur a ni.