Mizorama vawk natna PRRS len chhan Myanmar aṭanga vawk lakluh vang- MNYF

Mizo National Youth Fornt (MNYF) chuan nimin khan Aizawl Press Club-ah thuthar thehdarhtute kawmin, Mizorama vawk natna PRRS leng chu Myan-mar aṭanga vawk lakluh vang a ni tih pawm tura sorkar an duh thu an sawi.

MNF ṭhalai president K Vanlalvena chuan, February 2011 ah Myan-mar rama Mandalay leh a chhehvelah PRRS hmuhchhuah a nih thu sawiin, "March leh April 2011 ah Myanmar ramah PRRS avangin vawk 1000 an thih bakah, vawk damlo tam tak hmuhchhuah a ni. Myanmar khawpui thar Naypydaw hmunah pawh PRRS vei vawk 300 lai hmuhchhuah a ni. Hengte avang hian Myanmar ramah World Organisation for Animal Health (OIE) chuan Emergency a puang hial a ni," a ti.

Myanmar-a PRRS hmuhchhuah a nih lai hian Mizoram sorkar chuan Myanmar aṭanga vawk lakluh khapin, a lalut luite chu a hrem ngei tur a nih laiin, an duh sak zawng hnenah vawk lakluh phalna special permit pek a nih zawk thu sawiin K Vanlalvena chuan, "Hei hi Mizorama PRRS len chhanah ngai loh theih a ni lo," a ti a, Mizoram sorkar chu chhuanlam zawng kual loa, Zoram mipuite hnena thupha chawi tur a nih thu a sawi.

MNYF President chuan vawk thite zinga a tam zawk hi sorkar sem ni lo, miretheite'n anmahni sum senga an lei anih avangin leh Mizoram sorkar
thiltih dikloh avanga PRRS hi Mizorama leng a nih avangin zangnadawmna pek sorkarin a bat thu sawiin, "India hmun dangah PRRS a len thu kan hre lo. Kan ṭhen-awmte zingah Myanmar-ah chauh PRRS a len avang leh vawk leh vawk inkaichhawn
aṭanga lo awm anih avangin Myanmar aṭanga vawk lakluhin an rawn ken luh a ni lo thei lo. Zalen taka vawk lakluh tirtu sorkar hian thiamthu sawitur a nei loah kan ngai," a ti.

MNF ṭhalai tarlan danin, Mizoram sorkar hnuaia Vety dept.-in PRRS avanga vawk thi zat district hrang hrang report siam a dik lo a, vawk thi zat belhkhawm 3508 an sawi lai hian, an chhui chianna aṭang chuan vawk thi zat hi 4400 a tling tawh.