MNF sorkarah AR-te an inluling - C Ngunlianchunga
MLA C Ngunlianchunga chuan, MNF kaihhruai sorkar hnuaiah Assam Rifles-te Mizoramah an inluling hle nia sawiin, Mizoram police-te zahawmna humhim tura hma la turin Mizoram sorkar a phût.
Lunglei West bialtu MLA C Ngunlianchunga chuan nimin khan press statement tichhuakin, MNF sorkar hnuaiah Mizoram police-te'n zah an kai tâwk lo tih a tarlang a, "Tun hnaiah ringawt pawh AR-in vawi eng emaw zat Mizoram police hmalakna an palzût a, a pawi hle a ni," a ti.
C Ngunlianchunga tarlan danin, September 10, 2020 zan dar 11-ah Sangaua awm Mizoram police-te'n India leh Myanmar inrîna Archhuangkai-ah dan loa Mizorama phurh luh kuhva rah ip 550 an man a, Court-a thehluh tur seizure list pawh fel taka siam a ni. Kuhva rah chu Lawngtlai panpuina kawngah 17th Bn. AR duty-te’n Siachangkawnah zing dar 1 velah an lo man nawn leh a, police hnen aṭangin an chhuhsak a ni.
Hei vang hian Lawngtlai SDPO-in Bualpui police OC a tír a, mahse, AR-te nen an inbe rem thei lo a, police-te chu an inthiar fihlim ta zawk a, kuhva rahte pawh AR hoin Lungleiah an la ta a ni. AR-te chuan kuhva rah chu an man angin media lamah an puangzar zui bawk.
Vairengteah pawh AR sipaite'n checkgate-ah Mizoram police palzûtin an paltlang lui tawh a; Zokhawthar lamah Mizo sumdawngte bungrua vawi tam tak mansakin an tibuai tawh bakah, Mizoram rálmuanzia hre reng chungin rambuai ang maiin an duhna apiangah motor kal lai tidingin, mipui an tithlabâr fo a ni.
MNF sorkar hnuaiah AR an inluling hle nia sawiin Ngunlianchunga chuan, "Mizoram police-te leh Mizo mipui zah lo taka min palzût fo hi a pawi ka ti hle. AR-te'n MNF sorkar an ngam em em mai hi a mak a, sorkarin police leh mipui thlavâng a hauh nat ngam loh vangah ka ngai. MNF sorkar hnuaiah kan police-te zahawmna nasa taka a tlahniam hi a pawi tak zet a ni," a ti.
C Ngunlianchunga chuan, Mizoram chu rambuai a ni lo a, India rama state rálmuang ber a ni tih hria a, tualchhunga dan kengkawhtu Mizoram police-te nêk loin, zah takin thawhpui tawh turin Assam Rifles-te a chah a ni.