KHAWTHLIR

September 13, Pathianni zan dar 7:30 vel khan Hnahthial leh Tarpho inkara Tuichang lei bulah Hnahthial police-te’n heroin hawng 19 an man a; a neitua puh J Rothangliana (29) s/o J Sanghmuna leh Lalnunpuia (30) s/o Lalkhawliana (L), Hnahthial Venglai ve vete leh, ruihhlo phurhna atana an hman bike an man bawk. Heroin an man hi tualchhunga an hralhna ang chuan Rs. 8,55,000 man a ni.

Department of AYUSH chuan Covid-19 dona atana taksa tihchak theihna tur damdawi eng emaw zat chu Mizoram Journalist Association (MJA) general head­quarters hnenah an pe. An chungah MJA chuan lawmthu a sawi a ni.

State Referral Hospital-ah nimin khan Covid-19 vei mi pariat dah luh thar a ni a, mi pasarih, mipa pathum leh hmeichhia pali, kum 5-78 inkar an chhuak thung. SRH-ZMC Bulletin tarlan danin, SRH-ah hian hripui vei vangin mi 89 enkawl mek an ni a, ICU leh SICU-ah pakhat ve ve awmin, mi dang zawng Isolation ward-ah an awm a ni.

Zoram Drivers Union (ZDU) hruaitute chu nimin khan Mizo tanklorry driver-in Lailapur-a kut a tawrh chungchanga thil awm dan hre chiang turin Vairengteah an kal a, thil awm dan a hmunah enfiahin, a ṭul anga hmalak zel an tum. ZDU chuan thuchhuah siamin, "Silchar lam driver association inti ten, a duh dan dan a, Mizo mipuite hrek leh thunun an tum vanga harsatna an siam fo hi ṭha kan ti lo," an ti a, kuttuarte enkawlna leh lirthei chhe siamna man pe turin Silchar Truck Drivers Association-te chu an phût a ni.

Nimin tlai thleng khan Covid-19 dona atan Chief Minister Relief Fund-ah cheng vbc. 21.01 a lut tawh a, Committee on Utilization of CM Relief Fund for Covid-19 ruahmanna angin cheng vbc. 19.34 hman tawh niin, hman loh vbc. 1.66 a la awm.