February 20, 2025 aṭangin Mizoram sorkarin sawhthing a lei ṭan dawn
Agriculture & Farmers Welfare minister PC Vanlalruata, Mizoram Agricultural Marketing Board chairman ni bawk chuan, February 20, 2025 aṭangin Mizoram sorkarin kut hnathawktute thar sawhthing a lei ṭan dawn thu leh, secondary collection centre 54-ah sawhthing kg. khat Rs 50 zelin lei a nih dawn thu a sawi.
PC Vanlalruata hian nimin khan a pisaah thuthar thehdarhtute a kâwm a; ZPM sorkar flagship programme-a thlai thar lei chungchangah an sorkar kum khatnaah buhhûm an lei ṭan thu leh, thlai dang - sawhthing, aieng, hmunphiah leh hmarchate pawh a seng hun (season) a thlen ṭan avangin lei ṭan a nih dawn thu a sawi a ni.
Agriculture Minister chuan, "Hmarcha bik chu sorkarin a rate kan puan Rs 350 aia toin sorkar inrawlh lutuk ngai loin kut hnathawktute'n an hralh mek a, an hralh zel kan beisei. Thlai dang pathumte pawh an thar ṭan mek a, hmunphiah hi sorkar rate anga lei duh buyer pasarih kan nei tawh a, inremna kan ziah hunah an lei ṭan ang," a ti.
Sawhthing chu India ram hmun hrang hrang, a bikin central India leh south India lamah an thar tam avangin rate a sàn rih loh thu sawiin Minister chuan, "Khu lamah kg-ah Rs 20-25 vela an lei mek avangin kan sawhthing leitu turte hian tun dinhmunah Mizoram lam an la rawn hawi rih lo. Mizoram sorkarin secondary collection centre 54 aṭangin February 20, 2025 - Mizoram State Day aṭangin Mizorama thar sawhthing chu kg khat Rs 50-in kan leisak dawn," a ti a; Rs 50 aia toa hralhna tur hriate tan collection centre-ah phurh thlen kher a ngaih loh thu leh an duhnaah an hralh theih thu a sawi.
PC Vanlalruata chuan, February 20 aṭanga sawhthing lei turin sorkar a inbuatsaih mek thu sawiin, "Khaw hrang hrangah kut hnathawktute intêl khawmna society 675 kan nei tawh. Society-te hian anmahni khuaah sawhthing hralh turte hi an buaipui ang a, anmahni intum leh ruahmannain secondary collection centre-ah an rawn phur thleng ang a, kan lo leisak dawn a ni," a ti.
Agriculture Minister chuan, sawhthing leina tur sum sorkar kum 2024-25 atan budget-ah vbc 110 dah a nih thu leh budget tharah vbc. 200 dah a ni leh dawn thu a sawi a, "February 20, 2025 hmaa sum mamawhna avanga hralh duh leh Rs 50 aia toa hralh theite sorkarin a dâl lo," a ti. Secondary collection centre siam belh tum a nih thu a sawi bawk.
AGRICULTURE MINISTER SAWI DANGTE
▶ State dangah sawhthing rate a la tlâwm avangin February 20, 2025 aṭangin sorkarin a lei dawn.
▶ Kut hnathawktute'n sawhthing kg-ah Rs 50 aia tlâwma an hralh loh nan sorkarin a veng dawn.
▶ February 20, 2025 hmaa sum mamawhna avanga hralh duh leh Rs 50 aia toa hralh theite sorkarin a dâl dawn lo.
▶ Rs 50 aia toa hralh theih a nih hunah sorkarin a leisakna a tawp ang.
▶ Tunah hian kan chhût hnuhnun berah sawhthing quintal nuai 10 vel hralh tur a awm kan beisei.
▶ Sawhthing leina tur hi sorkar kum 2024-25 atan budget-ah cheng vbc 110 dah a ni a, budget tharah vbc 200 dah a ni leh dawn.
▶ Kumin hian thlai pali hi processing unit-ah luhpui kan tum a, nakkumah chuan processing unit kan neih nual tawh kan beisei.