HMPV vanga chî-âi lo turin mipui chah: 'Tlang hrilêng chi khat a ni' - HFW dept.

Health & Family Welfare department chuan, tunlaia ram ṭhenkhata léng leh India ramah pawha hmuh tawh Human Metapneumovirus (HMPV) chu tlang hriléng chi khat, kum danga léng ṭhin ang tho a nih thu an tarlang a, HMPV avanga chî-âi lo turin Mizoram mipui an chah.

HMPV chungchangah hian January 6, Thawhṭanni tlai khan Health minister Lalrinpuii hoin a pisaah HFW department hotute an ṭhukhawm a, HMPV chungchangah ruahmanna an siam. HMPV chungchanga a ṭul anga hma la turin Health Minister kaihhruai Core Committee on HMPV an din a, state pum huap leh district tinah rapid response team siam a ni.

Health department chuan, "He hritlang natna hi tlang hrilêng chi khat a ni a, kum danga lêng ṭhin ang tho a nih avangin sorkar chuan chî-âi mai lo turin mipuite a chah a ni," a ti.

"Thil thleng thuta inralrinna ram pum huap drill neih tawh chinah respiratory illness pun belh pawh ni se, inpuahchahna ṭha tak neih a ni," an ti a; HMPV kai rinhlelh an awm chuan an awmna aṭanga hnai ber sub-centre/health and wellness centre emaw, damdawi-in emaw pan vat turin an chah.

HFW department tarlan danin, HMPV hi India ramah chuan Karnataka state-ah nausen thla thum mi leh thla riat mi-ah hmuh chhuah a ni a, an ngaihtuahawm lo a, thla thum mi zawk chu damdawi-in aṭanga chhuahtir a ni tawh. "He natna hrik hi China chauh ni lo, khawvel pumah kum tin a léng a, kumtluana léng a ni a, hritlang satliah angin a lang chhuak ṭhin," an ti.

Health department chuan Integrated Disease Surveillance Programme (IDSP) kaltlangin HMPV chungchang an vil reng tih sawiin, "Tun hnaiah influenza like illness (ILI) leh severe acute respiratory illness (SARI) case tam thar thut report a awm lo," an ti a; HMPV test a ṭul a nih pawhin Zoram Medical College-ah test theih turin ruahman a nih thu an tarlang.

HFW department chuan, HMPV chungchang chu uluk taka vil reng a ni tih tarlangin, "Hri lêng darh palh thutah pawh hma la vat thei turin Health department a inring reng," an ti a; HMPV ang chi (ILI, SARI, etc.) an neih leh natna dang report ṭhin turte uluk leh kim taka sorkara hriattir ṭhin turin sorkar leh mimal damdawi-inte an chah.