Hnam hrang hrangte'n pumkhat kan ni tih kan hriat a pawimawh - DCMA Minister

Young Chakma Association (YCA) chuan nimin khan Marpara South-ah Annual Conference vawi 45-na an hmang a; District Council & Minority Affairs minister C Lalsawivunga'n hmanpuiin, Mizorama hnam hrang hrangte'n pumkhat an ni tih an hriat a pawimawh thu a sawi.

C Lalsawivunga chuan, Mizoramah hnam hrang hrang an awm tih sawiin, "Hnam hrang hrang awmte hian pumkhat kan ni tih hi kan hriat reng a pawimawh. Kan thiamnate kan ram tan hlan chungin thawhhona ṭha nei tura kan ṭanho zel ka duh. Mizorama hnam hrang hrang, culture hrang hrangte inunauna leh thawhhona ṭha kan neihna turin cultural exchange neih theih nan hma kan la zel dawn a ni," a ti.

Sorkarin hmalakna hrang hrang a nei tih sawiin Minister chuan, "District council lamah pawh hma nasa takin kan la a, hna ṭha taka thawh a nih theih nan monitor lamah YCA nen thawhho kan duh," a ti a; thawhpuiah YCA a sawm.

DCMA Minister chuan, Finance Commission grant chu sorkar hmasa lamah khan ṭum khat chiah dah a nih thu sawiin, "ZPM sorkar a lo pian khan chak takin hma kan la a, kum khat chiaha upa sorkar hian VC-te account-ah ṭum li kan thun. Central aṭangin panchayat bhawan 335 sakna tur approval min pe tawh a, hengte pawh hi ram pumah a rualkhai thei ang berin kan sem zai dawn," a ti.

ZPM kaihhruai sorkarin hnam inpum-khatna a ngai pawimawh tih sawiin Lalsawivunga chuan, "Hmasawnna pawh rualkhai taka kalpui a nih theih nan hma a la mek," a ti. Chakmate chu hnam bil rilru pu reng lo tura chahin, "Chief Minister hmalaknain central direct funding remtihna pawh kan pe tawh," a ti a, chu chuan sorkarin Mizorama chengte a en hran lohzia leh hnam tlem leh tenau zawkte a ngaihsakzia a tichiang niin a sawi.

C Lalsawivunga chuan, zu leh ruihhloin Mizoram a tibuai tih sawiin, "He harsatna sukiang tur hian Zoram hmun hrang hranga mite kan thawhho a ngai a, sorkar hmalaknate tihlawhtlingtu kan nih ṭheuh a pawimawh," a ti.

DCMA Minister chuan, "Mizoram hi ram zîm tê a ni a, kan ramngawte kan humhalh a pawimawh a, kan tuihnate leh nungchate humhalh kawngah inlungrual taka thawhho ka duh," a ti a; Handholding Policy a hlawhtlin theih nan hma an la mek tih sawiin, an policy chu term tawp dawna campaign nan hman kan tum ve lo a, ram hmangaihna thinlung nen tihhlawhtlin ngei an tum thu a sawi bawk.

YCA Conference hi senior vice president Mandira Chakma-in a kaihruai a, hnam lam leh zaite entir a ni. DCMA Minister bakah hian ZPM vice president C Lalnun-nema leh party hruaitu dangte'n an hmanpui a ni.