KHAWTHLIR

Tuialhthei phalna nei loa zawrh khap

Aizawl district magistrate Lalhriatpuia chuan hriattirna chhuahin, phalna nei loa petrol leh diesel zawrh (black) khap a nih thu a puang a, "Mi tu mahin phalna nei loin Aizawl district huam chhungah petrol leh diesel an zuarin an hralh tur a ni lo," a ti. Thupek zâwm loa dan loa tuialhthei zuarte chu mansak an nih dawn bakah, Bharatiya Nyaya Sanhita Section 223 hmanga hrem theih an nih thu tarlan a ni.

Union MoS kâwm

Chief minister Lalduhoma chuan nimin khan a pisaah Mizoram tlawha lo zin Union Tribal Affairs minister of state Durgadas Uikey a kâwm a; Ministry of Tribal Affairs kaltlanga Mizorama hnathawhte an sawi dûn.

Planning Board ṭhu

Mizoram Planning Board chairman Lalduhoma, chief minister kaihhruaiin nimin khan Chief Minister's Office conference hall-ah Planning Board hotute an ṭhukhawm. Planning Board-in a lo rel tawh hmalakna hrang hrang thlir let a ni a, hmachhawp eng emaw zat an duang bawk.

Lammualah R-Day

Aizawl DC Lalhriatpuia hoin nimin khan DC conference hall-ah January 26, 2025-a Republic Day hman dan tur sawiho a ni. Republic Day chu Lammualah lawm a, zing dar 8-ah ṭan an rêl a; Governor khuallian a ni ang a, sawm bikte tan Raj Bhavan-ah Governors' At Home buatsaih tura ruahman a ni.

Inkhawmpui hmang

Tuipuiral Zirlai Pawl chuan nimin khan Farkawn Community Hall-ah General Conference an hmang a, East Tuipui bialtu MLA Ramthanmawia'n a hmanpui. HSLC chin chung lam pass ṭhate hnenah leh HSLC leh HSSLC-a 100% pass result nei sikulte lawmpuina an hlan. Tuichangral Zirlai Pawl pawhin nimin khan Sailulaka Zakapa Hall-ah General Assembly an hmang a, Hrangturzo bialtu MLA Lalmuanpuia Punte-in a hmanpui. Khaw 14 aṭangin palai 200 vel an riak lut a ni.