Lunglei dáiah screening point Dah turin ZPM hotuin DC ngen

Zoram Peoples' Movement (ZPM) Southern headquarters treasurer Lalrinpuii chuan nimin khan Lunglei DC leh District Task Force on Covid-19 chairman V Lalsangliana a pisaah a hmu a; Lunglei khawpui him zawkna atan khawpui dáiah screening point dah turin a ngen.

Lalrinpuii hian Lunglei khaw daia screening point dah tura ngenna hi ziakin a thlen a, ṭawngkain a sawipui nghal. Lunglei mipui himna atan khawpuia mipuiin ni tina an hman maxicab, taxi leh auto-rickshaw khalhtute chu swab sample endiksak ṭul a tih thu thlenin, "Mipuiin kan inhman ṭâwm driver-te result aṭangin Lunglei khawpuiah kan him tlang em tih kan hre thei dawn a ni," a ti.

Lunglei bawrhsap V Lalsangliana pawhin Lunglei ZPM Treasurer thu thlen chu a ngai pawimawh thu hrilhin, Lunglei khawpui himna chu a ngaih pawimawh thu a sawi a; District Task Force committee ṭhutkhawmah pawh an lo sawi tawh thu leh ṭhutkhawm leh hmasa berah an lo ngaihtuah tur thu a sawi a ni.