SASCI leh fund danga thawh tur kan thlan leh kut kan thlâk tawh chu a ṭha tur a ni - CM

Chief minister Lalduhoma kaihhruaiin nimin khan CMO conference hall-ah State Level SASCI Committee an ṭhu a, SASCI hmanga hnathawh mek leh thawh tur thlan tawhte an thlirho. CM chuan, "SASCI leh fund danga thawh tur kan thlan leh kut kan thlak ve tawh chin chu a ṭha tur a ni," a ti.

CM Lalduhoma chuan, sorkarin a thil tih tinrengah moral reform a ngaihtuah thlen zel thu sawiin, "Hna chhia te, sorkar hnathawk inthlahdah lutukte kan remti lo. SASCI leh fund danga thawh tur kan thlan leh kut kan thlak ve tawh chin chu a ṭha tur a ni a, a huna zawh ngei pawh kan tum tlat tur a ni," a ti a, revise ngai awm lo se an duh thu a sawi.

Loh theih loha ennawn (revise) emaw, hna zawh hun tur pawhsei emaw a ngai a nih chuan Project Monitoring Committee-in an endik hmasa zel dawn tih sawiin CM chuan, "Hmasawnna hnathawhte hi a tir aṭangin Monitoring Committee hian a vil zel dawn a, a mawhphurtute kan ṭan tlan hle a ngai dawn a ni," a ti.

Chief Minister chuan, sorkar hmalakna tinrengah sorkar hnathawkte'n an thawhpui ṭhat avangin a lawm thu a sawi bawk.

Ṭhutkhawma tarlan danin, SASCI 2024-25 hnuaia thawh tur tarlan ṭhenkhatte chu sanction hmuh a ni tawh. SASCI 2023-24 hnuaia thawh mek zingah cheng vbc 500 senna PWD hnuaia hna 117 zinga 91 chu zawh thawkhat a ni tawh a, hna dangte pawh zawh thuai beisei a ni.

Meeting-ah hian Home minister K Sapdanga, Education minister Dr Vanlalthlana, Health minister Lalrinpuii, Commerce & Industries minister F Rodingliana, PHE minister Prof. Lalnilawma, Sports & Youth Services minister Lalnghinglova Hmar, adviser to CM TBC Lalvenchhunga leh sorkar hotu dangte an tel.