Champhai dist-a hmun 15-ah collection centre tur ruahman

Champhai district bawrhsap VL Remliana hoin nimin khan DC conference hall-ah District Agriculture Marketing Committee an ṭhu a; Handholding Policy hnuaia thlai lak khawmna leh hralhna tur chungchang sawihoin, thlai lak khawmna (collection centre) tur hmun 15-ah an ruahman.

Bawrhsap chuan, Bána Kaih Policy chu mipuite'n hlâwk taka an hman ṭheuh a beisei thu a sawi a, "Champhai district chuan thlai thar chhuah kan ngah dawn avangin Bana Kaih Policy tihlawhtling tur leh kut hnathawktute'n hma an sawn theih nan leh man zawka an thlaite an hralh theih nan line department-te an pawimawh a, theihtawp an chhuah a ṭul dawn a ni," a ti.

Ṭhutkhawmah hian thlai lak khawmna tur collection centre hmun 15 ruahman a ni a, January thla chhungin collection centre building-te tihchian tur a ni. Thlai tharte collecton centre-a dah leh hralhte awmze nei zawka kalpui a nih theih nan Collection Centre Supervisor neih tura hmalak an rel bawk.