Sorkar hnathawkte mipui rawngbawltu an ni - Vanlalthlana

Minister Dr Vanlalthlana hoin nimin khan a pisaah a enkawl - School Education, Higher & Technical Education, Information & Public Relations leh Information & Communication Technology department hotute'n kum 2025 atana infuihna hun an hmang a; Minister chuan, sorkar chu mipui ta a nih angin sorkar hnathawkte chu mipui rawngbawltu an nih thu a sawi.

Dr Vanlalthlana chuan, kum 2024-a department official-te nen thawhhona ṭha an neih avangin lawm thu a sawi a; kum thar a nih angin rilru thar pu chunga ram leh hnam tan theihtawpin thawk chhunzawm zel turin a department enkawla thawkte a chah.

Minister chuan, "Sorkar hi mipuite ta a nih angin sorkar hnathawkte hi mipui rawngbawltu an ni a, an hnathawhnaah an rawngbawlsak mipuite dah pawimawh hmasak nachang hre zel ang che u. Sorkar hi thawhhona leh inrin tawnna avanga kal thei a nih avangin thawhhona ṭha neih zel a ṭul," a ti.