Ruihhlo donaah nasa zawka hma la turin infuih

Excise & Narcotics department (END)-a thawkte chuan nimin khan END Commissionerate conference hall-ah kum thar 2024 atana inhlan tharna hun an hmang a; inpekna thûk zawk nen kum 2025-ah ruih theih thilte donaa hma la nasa zual zel turin an infuih.

Inkhawm hi END deputy commis-sioner T Lalramzauva'n a kaihruai a; END commissioner Z Lalhmangaiha chuan, END-a thawkte chu zu leh ruihhlo donaa thawk an ni a, an hna chu Pathian pek a ni tih pawm a, phûr tak leh rinawm taka thawk turin a chah.

Mizoram sorkarin ruihhlo do a ngai pawimawh tih sawiin Z Lalhmangaiha chuan, nasa zawk leh inpekna thûk zawk nen kum 2025-ah zu leh ruihhlo leh a kaihhnawih donaah nasa lehzuala hma la turin thawktute a fuih a; END district office thar pathum hawn a nih thu te, thawktu indaih lohna a theih ang anga hnawhkhah a nih thu sawiin, END thuam chakna tur leh mamawh tam tak sorkarin a ngaihtuahsak ṭhin avangin an lawm thu a sawi.

END Commissioner chuan, minister inpe leh taima tak an nei tih sawiin, "A kaihhruaina hnuaia tun hmaa Aizawla zu zawrhna hmun, 'A sen chi lane' tia hriat ṭhin, tuna 'Venbuk lane' tia thlak tâk hmuna zu leh a zuartute tihbo a ni hi a lawmawm," a ti.