2024-a Serchhip district-a TB vei hmuh mi 69 zinga 37 enkawl dam an ni tawh

Serchhip District TB Forum chu nimin khan an chairman Paul L Khuma, bawrhsap kaihhruaiin an ṭhu a; kum 2024 khan Serchhip district-ah ngawr (TB) vei hmuh chhuah mi 69 zinga 37 enkawl dam an ni tawh a, enkawl mek 32 an la awm thu tarlan a ni.

Bawrhsap chuan, TB natna chu ngaihthah chi a nih loh thu sawiin, "TB kan lo vei palh a nih pawhin ṭha taka damdawi ei hi a enkawlna awmchhun a ni a, TB veite'n TB damdawi ei an ngaih pawimawh a ṭul," a ti a; TB natna veite enkawlnaa thawktute inpekna fakawm a tih thu sawiin, theihtawp chhuah zel turin a chah.

Ṭhutkhawma tarlan danin, kum 2024 khan Serchhip district-ah TB vei mi 69 hmuh chhuah a ni a; December 2024 thleng khan mi 37 enkawl dam tawh niin, TB damdawi ei lai mi 32 awm mek a, an zinga pahnih chu multidrug-resistant tuberculosis (MDR-TB) vei an ni.

Ṭanpuina aṭanga TB vei damlote'n chawṭha an dawn theihna tura hmalakna 'Nikshay Mitra' hnuaiah Serchhip district-ah mi pahnihin ṭanpuina an dawng mek.

Kum 2023 khan Serchhip district-a khua 11 leh kum 2024-ah khua 35 chu TB Free Village-ah puan a ni a; kumin 2025-a World TB Day-ah district chhunga khaw tin chu TB Free Village-a puan hman beisei a ni.