Fisheries-a harsatnate sutkiansak turin Minister-in sorkar laipui a ngen

Fisheries minister Lalthansanga chu January 6, Thawhṭanni khan Raddision Blu Hotel, Guwahati-a North Eastern Region Fisheries Department Meet-ah a tel a; sangha khawi leh enkawl chungchanga Mizoramin harsatna a neihte sutkiansak turin sorkar laipui a ngen.

Lalthansanga chuan, Mizoram sangha khawi leh enkawlnaa hmasawnna tur leh harsatna hrang hrangte a sawi chhuak a; Mizoramin harsatna a neihte sutkiansak tur leh, Mizoram Fisheries department-in sorkar laipuia project a thehluhte pawmsak thuai turin sorkar laipui hotute a ngen a ni.

Meet hi Ministry of Fisheries, Animal Husbandry & Dairying leh National Fisheries Development Board (NFDB) buatsaih a ni a; Union Fisheries, Animal Husbandry & Dairying minister Rajiv Ranjan Singh bakah, minister of state Prof. SP Singh Baghel leh George Kurian ten an hmanpui.

Fisheries Meet-ah hian hmarchhak state-a Fisheries minister-te leh secretary-te an tel a; Mizoram aṭangin Fisheries Minister bakah secretary H Lalengmawia leh department hotu dangte an tel a ni.