School Education department-in H/S leh HSS-a thawkte a koh khawm tum a ṭhulh leh rih

School Education department chuan nimin khan order tichhuakin, September 15, 2020-a higher secondary school leh high school-a principal, headmaster, zirtirtute leh thawktu dangte an sikul awmna hmun (khua)-a awm tawh tura tihna thupek chhuah tawh chu hman rih loh tur a nih thu an tarlang.

Education department chuan September 8 khan order tichhuakin, H/S leh HSS-a principal, headmaster, zirtirtute leh thawktu dangte chu September 15 ral hmain an sikul awmna khuaa awm vek turin a hriattir a ni. Mahse, Mizoram sorkarin September 17 thleng partial lockdown a puan avangin thupek hmasa chu an sût leh rih.

Vanglaini palai zawhna chhangin School Education director James Lalrinchhana chuan, Ministry of Home Affairs (MHA)-in September 21 aṭangin pawl 9-12 zirlaite'n an nu leh pate phalna kengin an zirlaia an hriatthiam lohte sikulah an zirtirtute zawhfiah a phalsak tih a sawi a, "Hei vang hian sikul kal ṭan tur tihna a ni lo," a ti.

MHA thu bawhzuiin September 8, 2020 khan order an chhuah tih sawiin James Lalrinchhana chuan, "September 15, 2020-a awm kim kan tih chhan chu, sikul tam tak quarantine centre-ahte hman a ni a, chu'ngte chu tihfaite a ngai dawn a ni," a ti a; partial lockdown puan a nih tâk avangin order anga an kal theih loh thu a sawi.

School Education Director chuan, department lamin partial lockdown puan a nih chuan order chu kaltlangpui loh tura an ngaih nghal thu a sawi a, "Mahse, zawhna a tam lutuk a, partial lockdown lai pawh ni se, September 15-ah chuan an sikul awmna khua thleng tho tura ngai an tam. Chuvangin, order kan chhuah ṭha leh a, order hmasa angin nakinah kan la kal leh ang," a ti.

Boruak thlir chungin zirtirtute chu koh khawm leh an nih tur thu sawiin Director chuan, "MHA duh dan anga kan kal hunah pawh sorkarin Covid-19 vanga zawm tura a duante ṭha taka zawm chunga kal a ni ang," a ti a; principal/headmaster-te'n zirtirtu leh non-teaching staff-te chu an inkal chhâwk dan an ruahman tur thu a sawi.