Transport Minister-in mamawh a thlen

Transport minister Vanlalhlana chu January 7, Thawhlehni khan New Delhi-a state hrang hrang transport minister ṭhutkhawmna, 42nd Transport Development Council-ah a tel a, Mizoram mamawhte a sawi.

Minister Vanlalhlana chuan Mizoramah lirthei fitness endikna tur automated testing station (ATS) pakhat aia tam siam a nih theihna turin hmalak a ṭul thu a sawi a; March 2026 hnu lama Command and Control Centre hman chhunzawm zelna tura Mizoramin harsatna a neihte a tarlang.

Khualzin phur chi lirtheia vuah tur vehicle location tracking device and panic button (VLTDEAS) chu Mizorama lirthei neitute'n lei an harsat thu a sawi a; lirthei neitute'n hautak lo zawka an neih theih nan sorkar laipui chu subsidy 50% tal ngaihtuahsak turin a ngen a ni.

Transport Development Council hi sorkar laipuia Roads Transport and Highways minister Nitin Gadkari-a’n a kaihruai a; sorkar laipui policy thar Driver Training Centres (DTC) tlangzarh a ni.

Lirthei fitness endikna tur ATS te, accident tawkte tan sumfai hmang loa inenkawlna tur cashless treatment te, pilot project-a kalpui mek - lirthei vanga chetsualna a awma a mawhphurtu man an nih hmaa an tlanbo ṭhinna - 'hit and run' tuartu chhawmdawlna scheme-te thlirho a ni. Vehicle Scrapping Policy leh Registered Vehicle Scrapping Facility (RVSF) chungchang sawiho a ni bawk.

Minister Vanlalhlana hi Transport secretary Zosangliana leh director R Lalrammawia ten an ṭawiawm a ni.