Sorkarin ruang phurh man a tum chungchangah hriattirna tichhuak

Mitthi ruang phurh man Mizoram sorkarin a tumsak chungchangah Social Welfare, Tribal Affairs, Women & Child development chuan January 6, 2025 khan hriattirna (circular) an chhuah a; mitthi ruang phurh man tur cheng nuai 500 chu lak chhuah vek a nih tawh thu an tarlang.

Circular-a tarlan danin, ruang phurh man chu State Transport Authority-in rate a siam angin ruahman a ni a, km. khatah Rs 40 (garage to garage) zel a ni. Mitthi ruang phurh tur nei tan Mizoram Private Ambulance Association (MPAA) hruaitute hnenah hriattir theih a ni a, pawisa pek nghal ngai loin, MPAA lamin sorkarah an lo la (bill) ṭhin dawn a ni.

SWTA department chuan, ambulance chauh hman tura ruahman a ni lo tih tarlangin, "Motor dang pawh rate angin hman theih tho a ni a, bill erawh mahni inbuaipui a ngai thung ang. Pawisa draw sa vek tawh a nih avangin account-ah transfer zung zung theih a ni tawh," an ti.

Tarlan tawh angin, sorkarin ruang phurh man (bill) a peksak theih hnuah January 3, 2025 thleng khan dilna 180 lut tawhin, sum zat chu Rs 16,36,744 a nih thu SWTA minister Lalrinpuii chuan a lo sawi tawh a; kum 2024 Krismas hma khan ruang phurh man diltute bank account-ah pawisa thun a ni deuh vek tawh a, bank account-a buaina awmte hnenah chauh pawisa la thun loh a nih thu a sawi a ni.