Union MoS-in Mizoram sorkar hotute a kawm

Union Tribal Affairs minister of state Durga Das Uikey chuan January 7, Thawhlehni zan khan Regency Hotel-ah Social Welfare and Tribal Affairs, Women & Child Development department minister Lalrinpuii leh department official-te a kâwm.

Durga Das Uikey chuan, India rama tribal-te tihhmasawn chu a thil ngaih pawimawh a nih thu leh tribal zingah pawh hnam hnufual zawkte chawikang tura Ministry of Tribal Affairs kaltlanga ruahmanna hrang hrangte a tarlang.

Traibal Affairs Minister chuan, "Mizoram tan tun kum nga chhunga Ekalavya Model School atan te, Tribal Research Institute leh hmalakna dang hrang hrang atana sorkar laipui aṭangin sum pek a ni a, rang zawka sum pek chhuah zel a nih theih nan chak zawka hman zawh a ṭul avangin hna thawh chak a ṭul," a ti.

Tribal Affairs minister Durga Das Uikey chuan, sorkar laipuiin India ram pumah leh a bik takin India hmarchhak state-a tribal hnamte hmasawn nan ṭan a la nasa hle nia a sawi a; ram chhunga cheng zawng zawngte tan hmasawnna rualkhai leh huam kim tak siam a pawimawh thu a sawi bawk.

Minister Lalrinpuii chuan SWTAWCD department hmalakna hrang hrang a sawifiah a; sorkar laipui aṭanga sum hmuh hmanga hna thawh leh thlen chin te, harsatna leh mamawhnate a tarlan bakah, sorkar laipuiin scholarship sum a pek chhuah thuai theih nan hmalak sak turin Union Minister chu a ngen a ni.

Inkawmna hun hi SWTA secretary Lalzarmawii'n a kaihruai a, director Dr R Lalhriatzuali pawhin lawmthu a sawi a ni.