KHAWTHLIR

Thisen pe

KṬP, Kolasib Salem Branch-in an din champha vawi khatna pualin an kohhran hall-ah thisen unit 19 an pe a, petute mipa 14 leh hmeichhia panga an ni a; YMA, Saiphai Branch pawhin thisen unit 9 an pe bawk.

HBC-in NAAC Grade A a hmu

Hrangbana College chu National Assessment and Accreditation Council (NAAC)-in 'A' grade a pe thar. NAAC hian nikum 2024 khan HBC hi an endik a, nimin khan result an tichhuak a, CGPA 3.2 hmuin, ‘A’ grade an pe a ni. HBC hi NAAC-in grade ṭum li a pekna a ni a, grade pek thar hi kum 2029 thleng a nung ang. Hrangbana College hi kum 1980-a din a ni.

Heroin man

Excise & Narcotics department leh Assam Rifles sipaite chuan January 7, Thawhlehni zan dar 8:30 khan Champhai Electric Vengah heroin (no. 4) gram 119.700 (hawng 10) an man a; a neitua puh mi pathum - Samuel Lalchawimawia (25) s/o C Lalremruata, Champhai Electric Veng, Lalchhanhima (20) s/o C Vanlalruata, Champhai Bethel Veng leh Rebecca Laldingliani (23) d/o T Lalramlawma, Champhai Vengthlang North nia inchhálte an man bawk. Mi pathumte hi nimin khan Champhai District Court-ah an hruai a ni.

Minister-in enfiah

Minister K Sapdanga chuan nimin khan a bial Aizawl North-III chhunga Chanmari West kâwipui aṭanga Edenthar Veng panna kawng siam tur a hmunah a en a, AMC-a bialtu corporator H Lalremtluanga leh PWD hotute'n an ṭawiawm. K Sapdanga chuan, kawng siamna tur PWD sum an ruahman sa zingah a la tel loh avangin MLA fund leh remchang dapa siam tura tih a nih thu a sawi a, kawng ṭha tak siam turin PWD hotute a chah.

Agneepath inzirtir

Aizawla Assam Rifles chuan January 7, Thawhlehni khan an hmunah ṭhalaite tan sipai lak dan kalphung thar, Agneepath scheme chungchang inhrilhfiahna hun an buatsaih. He hunah hian Mizo ṭhalai eng emaw zat an tel a; Agneepath scheme hnuaiah sipai lak dan kalphung te, sipaia ṭan ṭhatna leh hamṭhatna awm hrang hrangte an hrilhfiah a ni.