Mumbai pan a him rih lo - MMA

Mumbai Mizo Association (MMA) chuan, tun dinhmunah Mumbai pan rih loh a him thu an tarlan rualin, laklawh thil leh ṭulna bik vanga Mumbai pan ngei ngai an awm chuan, MMA hruaitute hnenah hriattir hmasa a, an hnen aṭanga thurawn la hmasa tur leh, Mumbai-a awm zui turte chu MMA-a inziak lut ngei turin an ngen.

MMA chuan, sorkar laipuiin Unlock 4.0 a kalpui mek a, inkhuahkhirhna pawh a thlahdul tial tial avangin MMA member-te leh Mumbai-a awm thar turte pawh hna leh zirna avangin Mumbai pan mek leh pan tum hnai an awm leh ṭan tih an tarlang a; chutih rualin, Mumbai chu India rama Covid-19 hluar berna hmun a nih avangin, tunah chuan Mumbai pan rih loh a him zawka an ngaih thu an sawi.

Mumbai chu India rama Covid-19 hluar berna hmun a nih avangin, inkhuahkhirhna thlahdul mek ni mah se, ni tinin hripui kai an pung zel tih tarlangin MMA chuan, "Office leh zirna-inte a pangngai angin a la kal lo chungin mipui veivak an tam tial tial a, hri kai theihna a sang tial tial zel. Hei hi tuna Mumbai dinhmun a nih avangin, boruak a pangngai deuh hma chu Mumbai rawn pan rih loh hi kan him tlànna tur niin kan hria," an ti.

MMA hian loh theih loha Mumbai pan ngaite tan MMA hruaitute biak theihna tur phone number an tarlang a; chu'ngte chu - V Zaithanmawia, president - 7738525456, David Sinate, vice president - 9820837527, V Lalrindika, general secretary - 7005612169 leh Lalthansanga Hauhnar, assistant GS - 9930964946-te a ni.