Kum khat chhungin CM Relief Fund-ah Rs 2,44,77,650 a lut, Rs 1,53,71,349 sem

Chief Minister's Relief Fund (CMRF)-ah December 18, 2023 aṭanga December 18, 2024 inkar, kum khat chhungin pawl leh mi hrang hrangin Rs 2,44,77,650 an chhûng lut a, ṭanpuina Rs 1,53,71,349 pek chhuah a ni.

Chief Minister's Office website-in a tarlan danin, December 18, 2023 aṭanga December 18, 2024 chhung khan online/cheque/cash-in CMRF-ah pawl leh mimal 252-in Rs 2,44,77,650 an chhung lut a; chhûng lut tam ber pathum - Kundan Green Energy, NEDFI leh TEESTA Distributors ten Rs 25,00,000 ṭheuh an thawh.

CMRF sum hmannate CMO website-in a tarlan danin, December 21, 2023 leh December 12, 2024 chhung khan mimal/pawl 517 hnenah ṭanpuina Rs 1,53,71,349 pek chhuah a ni a; ṭum khatah Rs 2,000 - 5,00,000 inkar pek a ni.

CMRF kaltlanga ṭanpuina sum hi damlo, khawsak harsa, home leh hmeithai in sak ṭanpuina atan te, damdawi-ina damlo awmna ba rulhna atan te, oxygen concentrator, wheelchair leh bengdâr leina atan te, raltlan relief camp sakna atan te, Cyclone Remal vanga chhiatna tâwkte leh leimin/lungrem chim siamṭhatna atan te, vantlang hnatlang puihna atan te, rialin in chung a den chhiatte rangva leina atan te, sabereka khuangkaih vanga in chhia sak ṭhatna leh tuikawng chhia siamṭhatna atan te, Central YMA Disaster Response Team mamawh leina atan leh thil dang hrang hrang atante pekchhuah a ni.