Sorkar inrawlh tam vangin Mizorama thlai tharte hralh a buai - Zodintluanga

All India Adivasi Congress Committee-a National Executive member Zodintluanga Ralte chuan, sorkar inrawlh tam lutuk avangin Mizorama thlai tharte hralh chhuah a buai a, kut hnathawktute'n harsatna an tawh phah niin a sawi.

Zodintluanga Ralte hian January 7, Thawhlehni khan Young Chakma Association Annual Conference, Marpara South-a neih a hmanpui a; loneitute nen an inkawmnaah, "Thangṭhat lak an tum luatah ZPM sorkar chuan kut hnathawktute thlai thar hralh chhuahna kalkawng a tibuai nasa hle," a ti.

Khawthlang lama chengte'n hmunphiah an chíng nasa tih sawiin Zodintluanga chuan, "Tun hma zawngin a hralh chhuahna lamah harsatna in tâwk ngai lo a, in lo tih ṭhin dan angin tluang takin in hralh mai ṭhin," a ti a; nikumah ZPM sorkar a inrawlh a, hmunphiah hralh a buai ta niin a sawi.

Zodintluanga Ralte chuan, ZPM chu nuamtawl sorkar hrilhfiahna ṭha ber an nia sawiin, "An sorkar nuamsa taka an kal theih nan sum an pûk hmiah hmiah a, buhfai man an ti to a, petrol leh diesel-ah chhiah sang em em mai an la. Chuti chung chuan hmasawnna project lian tham kum khat chhungin state tan an la thawk lo. Sorkar chiah an duh tâwk a ni ber, a bak eng mah tih an tum lo, an thiam bawk lo a ni," a ti.