DDU-GKY hnuaia training tawh 2,892 zinga mi 1,788-in hna an hmu tawh

Rural Development minister Prof. Lalnilawma hoin nimin khan Mizoram State Rural Livelihoods Mission (MzSRLM) hnuaia Deen Dayal Upadhyaya Grameen Kaushalya Yojana (DDU-GKY) chungchanga hmalak tawhna leh hmalak zel dan tur sawiho a ni a; DDU-GKY hnuaia training tawh mi 2,892 zinga 1,788-in hna an hmu tawh tih tarlan a ni.

Prof. Lalnilawma chuan, tun dinhmunah DDU-GKY hnuaiah hlawhtlinna tam tak hmuh tawh a nih thu sawiin, "Department ang leh PIA (project implementing agency) lamah pawh hmasawn zel tura hmalak erawh a pawimawh," a ti a; DDU-GKY 2.0 programme thar tlangzarh theih ṭêp a nih thu a sawi.

DDU-GKY hi sorkar laipui Ministry of Rural Development department hnuaia skills development project a ni a, thingtlanga cheng ṭhalai kum 18-35 inkarte'n eizawnna ngêlnghet an neih theihna tura themthiamna (skill) zirtirna a ni. Skills development atan project implementing agency-te kaltlangin trade hrang hrangah training buatsaih ṭhin a ni.

Ṭhutkhawmah hian MzSRLM chief executive officer Zosangzuali Pachuau leh state mission manager Lalvensanga te pawh an tel.

ṬHUTKHAWMA TARLANTE

☑ DDU-GKY hnuaiah thingtlanga cheng ṭhalai kum 18-35 inkar mi 2,892-te training neihpui a ni tawh.

☑ Training zinga mi 1,788-in India ram chhung leh pâwnah hna an hmu tawh.

☑ DDU-GKY hnuaia training theih tlangpuite - airline cabin crew, food & beverage service assistant, domestic data entry operator, retail sales associates, house keeping, etc.