Ruang phurh man tumsakah lawm

ZPM Ṭhalai chuan thuchhuah siamin, Mizoram sorkara Social Welfare, Tribal Affairs, Women & Child development-in ruang phurhna sênso a taka a tum ta chu lawmawm an tih thu leh a chengtu minister Lalrinpuii hmalakna an chhuan thu an tarlang.

Ruang phurhna senso chu mirethei leh harsa zawkte tana a hautak hle tih sawiin ZPM Ṭhalai chuan, "Harsatna tawh fo tiziaawm turin sorkar chuan ruahmanna fel tak siamin, chhiat tâwk chhungkuate harsatna sutkianna tura ruang phurh man chungchanga ruahmanna mumal leh fel tak a siam ta hi lawmawm kan ti tak zet," an ti.

ZPM ṭhalaite chuan, "Ruang phurh man sorkarin a tumna tura ruahmanna a lo hlawhtlin theihna tura minister Pi Lalrinpuii hmalakna leh thawhrimna te, chief minister Pu Lalduhoma kaihhruai sorkar remhriatna te, Finance department-a thawktute leh Health department-a thawktute zawng zawng inpekna leh thawhrimnate chhuanawm kan tiin, mirethei leh harsa zawkte ban phak sorkar a piang ta hi lawmawm kan ti tak zet a ni," an ti bawk.