Sorkar hnathawk NGO-a inhmang Sorkar doa hma la thin an awm: HM

Home minister R Lalzirliana chuan, sorkar hnathawk zing­ah tlawmngai pawla thûk taka inhmang, sokar do zawnga hma la ṭhin an awm tih a sawi a, "Sorkar hnathawk tan tih loh tawp tur a ni. Action lak theih a nih avangin fimkhur a pawimawh," a ti.

Home Minister hian nimina Champhaia sorkar office-a hotu lute Champhai Circuit House-ah a kâwm a, "Thil tih theih tawp loh tur chu hotute lam aṭanga ti tura hriattirna a awm pawhin, hlen theih a nih loh dan chiang taka inbengvar mai tur. Tumahin thil dik lo ti turin hotute kawng kawhhmuh tum loh tur a ni," a ti a; sorkar hnathawkte chu rinawmna nen ṭha taka hna thawk turin a chah a ni.
Sorkar hnathawk zingah Conduct Rules hre chiang lo leh ngai pawimawh tâwk lo an awm tih sawiin, R Lalzirliana chuan, "Confidential file-te social media lama lo pût chhuak ta maite leh office dawr tura lo kalte ṭawngkam ṭhaa chháng duh lote an awm ṭhin," a ti.
Home Minister ṭawiawmtu, Mizoram Youth Commission chairman T Sangkunga, MLA chuan, khawi hmunah pawh awm se, khaw mipuite tana
ṭhahnemngai taka thawh a ṭul thu a sawi a, "Department hrang hrangte hmalakna a inang lo ang bawkin, an harsatnate pawh a inang lo," a ti a; harsatna a awmin district administration enkawlna hnuaiah felfai takin district tana ṭha ber turin department tinte thawhona ṭha nen thawk zel tur­in kalkhawmte chu a sawm a ni.
T Sangkunga chuan, Champhai district-a sorkar hnathawkte chu an post-ah an awm ṭha hlawm hlea a hriat thu sawiin, "Hmun hlá leh kilkhâwr zawka sorkar hnathawkte zingah a khaw mi leh sa ngeite hi a thawk ṭha ber an ni mai em tih theih khawpin ṭhahnem an ngai ṭhin hi a lawmawm hle a ni," a ti.
Home Minister leh MYC Chairman-te hian vawiinah Khawbungah Education Awareness Campaign an hmanpui leh ang.